ᑕᕝᕚᑭ 101

ᑕᕝᕚᑭ 101

ᑕᕝᕚᑭ ᐃᓚᒋᔭᐅᓚᐅᖅᓯᒪᙱᑦᑐᖅ ᐃᓄᐃᑦ ᐃᓕᖅᑯᓯᖓᓐᓂ

ᖃᓪᓗᓈᑦ ᕿᓚᓗᒐᕋᓱᐊᖅᑏᑦ ᐅᑭᐅᖅᑕᖅᑐᒨᓚᐅᖅᐳᑦ 1600 ᓄᙳᐊᓂ ᐊᒻᒪᓗ 1700-ᖏᓐᓂ. ᐳᓛᖅᑎᓪᓗᒋᑦ, ᖃᐅᔨᒋᐅᖅᑎᑦᑎᓚᐅᖅᐳᑦ ᑕᕝᕚᑭᒥᑦ ᐃᓄᖕᓄᑦ. ᕿᓚᓗᒐᕋᓱᐊᖅᑏᑦ ᑕᐅᖅᓰᕙᓚᐅᖅᐳᑦ ᑕᕝᕚᑭᒥᑦ ᐊᒻᒪᓗ ᐊᓯᖏᓐᓂ ᐱᖁᑎᓂᑦ ᒥᖅᑯᓄᑦ. 

ᑕᐃᔅᓱᒪᓂ, ᖃᐅᔨᒪᓚᐅᙱᓚᑦ ᓱᐴᖅᑐᕐᓂᖅ ᐊᒻᒪᓗ ᑕᒧᐊᔭᐅᓲᑦ ᑕᕝᕚᑭ ᐱᐅᙱᓐᓂᐊᓗᖏᓐᓂᑦ ᐊᒻᒪᓗ ᐊᒃᑐᐃᓂᕆᔭᖓᓂ ᐋᓐᓂᐊᖃᖅᑕᐃᓕᒪᓂᒃᒧᑦ. ᑭᓯᐊᓂ ᒫᓐᓇ ᖃᐅᔨᒪᕗᒍᑦ ᑕᕝᕚᑭᒥᑦ ᐊᑐᖅᑕᐅᓂᖓ ᑐᕌᕐᓂᖃᖅᐳᖅ ᐋᓐᓂᐊᕐᓂᕐᓄᑦ ᐊᒻᒪᓗ ᑐᖁᒧᑦ. 

ᐱᓕᕆᖃᑎᒌᒋᐊᖃᖅᐳᒍᑦ ᓇᖏᖅᓯᒪᓂᕐᒧᑦ ᐊᑭᕋᖅᑐᕐᓂᕐᒥᑦ ᑕᕝᕚᑭ. ᑕᑯᒃᓴᐅᑎᑦᑎᔭᕆᐊᖃᖅᐳᒍᑦ ᑕᕝᕚᑭᒥ ᐊᑐᖅᐸᓚᐅᙱᓐᓇᑦᑕ ᐊᒻᒪᓗ ᑕᕝᕚᑭᒥᑦ ᐊᑐᖅᐸᒍᓐᓃᕐᒥᓗᑕ ᑕᕝᕚᑭ ᑕᒫᓂ ᐃᓂᒃᓴᖃᙱᒻᒪᑦ.

ᖃᓄᑎᒋ ᑕᕝᕚᑭᑦ ᓂᐅᕕᐊᒃᓴᐅᓲᖑᕙᑦ ᓄᓇᕗᒻᒥ?

  • 2013-ᒥ, ᓄᓇᕗᒻᒥᐅᑦ ᐊᑐᓚᐅᖅᐳᑦ ᐅᓄᕐᓂᖅᓴᒥᑦ $48 ᒥᓕᐊᓐᓂᑦ ᑕᕝᕚᑭᒧᑦ ᓴᓇᓯᒪᔪᓂᑦ.
  • 66 ᒥᓕᐊᓐᐸᓗᖕᓂ ᓯᒡᒐᓕᐊᓂᑦ ᓂᐅᕕᐊᒃᓴᐅᓚᐅᖅᐳᑦ ᓄᓇᕗᒻᒥ 2013-ᒥᑦ.

ᑐᓴᕈᒥᓇᖅᑐᑦ ᓱᓕᓂᐅᔪᑦ ᑕᕝᕚᑭᒥᑦ ᓴᓇᔨᐅᔪᓄᑦ.

  • ᓯᒡᒐᓕᐊᓄᑦ ᑲᒻᐸᓂᐅᔪᑦ ᑕᑯᒃᓴᐅᑎᑦᑎᕙᒃᐳᑦ "ᓴᙲᑦᑐᓂᒃ" ᓯᒡᒐᓕᐊᓂᑦ ᐅᓗᕆᐊᓇᙱᓐᓂᖅᓴᐅᓂᖏᓐᓂᑦ, ᑭᓯᐊᓂ ᑕᐃᒪᓐᓇᑦᑕᐃᓐᓇᖅ ᑖᓚᒥᑦ ᐊᒻᒪᓗ ᑕᕝᕚᑭᒦᑦᑐᒥ ᐅᐃᕆᓐᓇᖅᑐᖃᖅᐳᑦ ᓯᒡᒐᓕᐊᑐᐃᓐᓇᓂᑦ.
  • ᑕᕝᕚᑭᓄᑦ ᑲᒻᐸᓂᐅᔪᑦ ᑐᕌᖅᑎᑦᑎᕙᒃᐳᑦ ᒪᒃᑯᒃᑐᓂᑦ ᐃᓄᖕᓂᑦ. ᓴᖅᑭᑎᑦᑎᒥᒪᕗᑦ ᑕᕝᕚᑭᓂᑦ ᖃᓄᐃᑦᑑᓂᖏᓐᓂᑦ ᓰᕐᓇᑐᓂᑦ ᐱᕈᖅᑐᕕᓂᕐᓂ ᐊᒻᒪᓗ ᓄᖑᓴᒐᕐᓂᑦ ᑎᐱᓕᖕᓂᑦ. ᑲᒻᐸᓂᐅᔪᑦ ᐃᒪᐃᖁᔨᕗᑦ:
    • ᓯᕗᓪᓕᖅᐹᒥ ᓱᐴᖅᑐᕐᓂᖅ/ᑕᕝᕚᑭᒥᑦ ᑕᒧᐊᔭᐅᓲᑦ ᐊᑐᕐᓂᐅᔪᒥᑦ ᒪᒪᕐᓂᖅᓴᐅᓗᓂ;
    • ᓱᐴᖅᑐᕐᓂᖅ ᐱᔪᒥᓇᖅᑎᓪᓗᒍ;
    • ᐃᔨᕐᓗᒍ ᑎᐱᖓᓂ ᐊᓯᔾᔩᓂᕐᒧᑦ ᐊᓯᒥᒃ-ᐳᔪᕐᒥᑦ ᓱᐴᖅᑐᕐᓂᕐᒧᑦ; ᐊᒻᒪᓗ
    • ᐊᔭᐅᕆᓗᑎᒃ ᖃᐅᔨᓇᓱᐊᕐᓂᕐᒧᑦ ᐊᒻᒪᓗ ᓱᐴᖅᑐᕐᓂᖅ ᐊᔪᕐᓇᙱᓐᓂᖅᓴᐅᓂᕐᒧᑦ.
  • ᑕᕝᕚᑭ ᑲᒻᐸᓂᐅᔪᑦ ᑐᕌᖓᓂᖃᖅᑎᑦᑎᕙᒃᐳᑦ ᐊᕐᓇᓄᑦ ᑕᑯᒃᓴᐅᑎᑦᑎᓂᕆᔭᖏᓐᓂᑦ.
  • ᑭᓯᐊᓂ 1999-ᖑᖅᑎᓪᓗᒍ, ᑕᕝᕚᑭᒧᑦ ᑲᒻᐸᓂᐅᔪᑦ ᐃᓕᓯᕙᓚᐅᖅᐳᑦ ᓂᐅᕕᕐᕕᓂ ᑕᑯᒃᓴᐅᑎᑕᐅᓂᐅᔪᓂᑦ ᓱᕈᓯᐅᑉ ᐃᔨᖏᑕ ᓇᓕᒧᓐᓂᖏᓐᓂᑦ. 

2006-ᒥᑦ, ᐱᒻᒪᕆᐅᔪᑦ ᑕᕝᕚᑭᒧᑦ ᑲᒻᐸᓂᐅᔪᑦ ᔫᓇᐃᑎᑦ ᔅᑕᐃᑦᔅᓂ ᓇᓂᔭᐅᓚᐅᖅᐳᑦ ᐸᓯᔭᒃᓴᐅᓂᖏᓐᓂᑦ ᑕᒻᒪᖅᓴᐃᓂᖏᓐᓄᑦ ᐊᒥᐊᓕᑲᐅᔪᓂᑦ ᐊᕐᕌᒍᓄᑦ 50-ᓄᑦ ᐅᓗᕆᐊᓇᕐᓂᖏᓐᓄᑦ ᓱᐴᖅᑐᕐᓂᕐᒥᑦ.