ᑕᕝᕚᑭᓂᒃ ᓴᓇᔭᐅᕙᒃᑐᑦ ᖃᓄᐃᑦᑑᓂᖏᓐᓂᑦ

ᑕᕝᕚᑭᓂᒃ ᓴᓇᔭᐅᕙᒃᑐᑦ ᖃᓄᐃᑦᑑᓂᖏᓐᓂᑦ

ᐱᖓᓱᓂᑦ ᖃᓄᐃᑦᑑᓂᖃᒐᔪᒃᐳᑦ ᑕᕝᕚᑭᓂᑦ: ᓱᐴᖅᑐᖅᑕᐅᕙᒃᑐᑦ ᓴᓇᓯᒪᔪᓂᑦ, ᐳᔪᖃᙱᑦᑐᓂᑦ ᓴᓇᓯᒪᔪᓂᑦ ᐊᒻᒪᓗ ᑕᕝᕚᑭᒦᑦᑐᒥ ᐅᐃᕆᓐᓇᖅᑐᓕᖕᓂ ᓴᓇᓯᒪᔪᓂᑦ. ᑕᒪᕐᒥᒃ ᐃᓗᓕᓕᖕᓂᑦ ᑕᕝᕚᑭᒦᑦᑐᒥ ᐅᐃᕆᓐᓇᖅᑐᒥᑦ, ᐅᐃᕆᑎᑦᑎᔪᓐᓇᖅᐳᑦ ᐊᒻᒪᓗ ᐋᓐᓂᐊᖃᖅᑕᐃᓕᒪᑎᑦᑎᓂᕐᒧᑦ ᐊᑲᐅᙱᓕᐅᕈᑕᐅᔪᓂᑦ.

ᓱᐴᖅᑐᖅᑕᐅᕙᒃᑐᑦ ᓴᓇᓯᒪᔪᑦ ᑕᒪᒃᑯᐊ ᐃᑭᑦᑎᕙᒃᑐᓂ ᑕᕝᕚᑭᒥᑦ. ᓱᐴᖓ ᓂᐅᖅᑕᐅᔪᓐᓇᖅᐳᖅ, ᐅᕝᕙᓘᓐᓃᑦ ᐱᓯᒻᒥᔭᐅᓗᓂ ᖃᓂᕐᒥᑦ. ᑕᒪᒃᑯᐊ ᓴᓇᓯᒪᔪᑦ ᐃᓚᖃᖅᐳᑦ:

ᓯᒡᒐᓕᐊᓂᑦ: ᓯᕗᓪᓕᖅᐹᖑᓪᓗᓂ ᐱᔭᐅᒐᔪᓛᒥᑦ ᑕᕝᕚᑭᒥᑦ ᓴᓇᓯᒪᔪᒥᑦ ᓯᓚᕐᔪᐊᓕᒫᒥᑦ. ᓯᒡᒐᓕᐊᑦ ᓴᓇᓯᒪᕗᑦ ᓯᖃᓪᓕᓯᒪᔪᓂᑦ ᑕᕝᕚᑭᒥᑦ. ᑕᕝᕚᑭ ᐃᒧᔭᐅᓪᓗᑎᒃ ᐸᐃᑉᐹᒧᑦ-ᐅᓕᒃᓯᒪᔪᓄᑦ ᐴᖑᔪᓂᑦ. ᑕᕝᕚᑭᒧᑦ ᑲᒻᐸᓂᐅᔪᑦ ᐊᑐᖅᐸᒃᐳᑦ ᕼᐊᓐᓇᓚᖏᓐᓂ ᐃᓚᐅᕈᑎᒃᓴᓂᑦ ᓴᓇᓂᕐᒧᑦ ᓯᒡᒐᓕᐊᓂᑦ. ᐃᓚᓯᕙᒃᑭᕗᑦ ᑎᐱᐅᔪᓂᑦ, ᓲᕐᓗ ᓱᕝᕕᐅᕐᓇᖅᑐᓂᑦ.

ᓇᖕᒥᓂᖅ ᐃᒧᓯᔪᓂᑦ (RYO) ᓯᒡᒐᓕᐊᑦ: ᑕᒪᒃᑯᐊ ᓯᒡᒐᓕᐊᑦ ᐃᒧᔭᐅᕙᒃᐳᑦ ᓱᐴᖅᑐᖅᑎᐅᔪᒧᑦ. ᐊᑐᓲᖑᕗᑦ ᓯᒡᒐᓕᐊᓄᑦ ᐸᐃᑉᐹᓂᒃ ᐃᒡᒐᒧᑦ-ᐃᓗᓪᓕᖅᓯᓪᓗᑎᒃ ᑕᕝᕚᑭᒥᑦ ᐃᓗᓕᖃᕐᒥᔪᓂᑦ ᕼᐊᓐᓇᓚᖏᓐᓂᑦ ᐃᓚᐅᕈᑎᒃᓴᓂᑦ

ᓯᒡᒑᑦ: ᓯᒡᒑᑦ ᐃᓗᓕᖃᖅᐳᑦ ᐸᓂᖅᑎᓯᒪᔪᓂᑦ ᐊᒻᒪᓗ ᓄᑕᐅᙱᓕᖅᓯᐊᖑᔪᓂᑦ ᑕᕝᕚᑭᒥᑦ. ᑕᕝᕚᑭ ᓱᑲᖓᔪᒥᑦ ᐃᒧᔭᐅᕗᖅ ᐊᒻᒪᓗ ᐃᑭᑕᐅᓪᓗᓂ. ᓱᐴᖅᑐᖅᑎᐅᔪᖅ ᓂᐅᖅᖢᓂᐅᒃ ᓯᒡᒑᑉ ᐳᔪᖓᓂ ᖃᓂᖓᓄᑦ ᐊᒻᒪᓗ ᓱᐱᓪᓗᓂᐅᒃ.

ᐳᔪᖃᙱᑦᑐᑦ ᓴᓇᓯᒪᔪᑦ ᐃᓚᖃᖅᐳᑦ ᑕᕝᕚᑭᒥᑦ ᓴᓇᓯᒪᔪᓂᑦ ᐱᔭᐅᕙᒃᑐᓂ ᖃᓂᒃᑯᑦ ᐅᕝᕙᓘᓐᓃᑦ ᕿᖓᒃᑯᑦ ᐃᑭᑎᑕᐅᓇᑎᒃ. ᐃᓚᖃᖅᐳᑦ:

ᑕᒧᐊᔭᐅᓲᑦ ᑕᕝᕚᑭ. ᑕᒧᐊᔭᐅᓲᑦ ᑕᕝᕚᑭ ᐃᓕᔭᐅᕗᖅ ᖃᓂᕐᒧᑦ, ᐅᓗᐊᖓᑕ ᐃᓗᐊᓄᑦ, ᐅᕝᕙᓘᓐᓃᑦ ᖃᓂᖓᑕ ᐃᓗᑦᑎᐊᖓᓄᑦ. ᒥᓗᒃᑕᐅᓪᓗᓂ ᐅᕝᕙᓘᓐᓃᑦ ᑕᒧᐊᔭᐅᓪᓗᓂ. ᐃᓛᓐᓂᒃᑯᑦ ᑕᐃᔭᐅᕙᒃᐳᑦ “ᑎᕝᕗᐊᖅᑕᐅᓲᖅ ᑕᕝᕚᑭᒥᑦ”. ᐱᔾᔪᑎᖃᖅᐳᖅ ᐊᑐᖅᐸᒃᑐᑦ ᑎᕝᕗᐊᖅᓯᕙᖕᒪᑕ ᑕᕝᕚᑭᐅᑉ ᐃᒪᕈᕐᓂᐅᔪᓂᑦ ᐊᒻᒪᓗ ᓄᕙᖓᓂ.

ᓇᐃᒥᖅᑐᖅ. ᓇᐃᒥᖅᑐᖅ ᓯᖁᑦᑎᖅᓯᒪᔪᒥᑦ ᐅᕝᕙᓘᓐᓃᑦ ᓯᖃᓪᓕᓯᒪᔪᒥᑦ ᑕᕝᕚᑭᒥ. ᐸᓂᖅᑑᕙᒃᐳᑦ ᐅᕝᕙᓘᓐᓃᑦ ᒪᓴᐅᕈᔪᒃᖢᑎᒃ. ᐸᓂᖅᑐᑦ ᓇᐃᒥᖅᑐᑦ ᑕᕝᕚᑭ ᓯᖁᑦᑎᖅᓯᒪᕐᔪᐊᖅᑐᒥᑦ ᑲᑎᙵᓂᐅᕗᑦ. ᓂᐅᖅᑕᐅᒐᔪᒃᑐᑦ ᐊᒻᒪᓗ ᐃᔅᓴᒃᑕᐅᓪᓗᑎᒃ ᕿᖓᒃᑯᑦ. ᒪᓴᐅᓂᒐᓚᐃᑦ ᓇᐃᒥᖅᑐᑦ ᐱᔭᐅᓲᖑᕗᑦ ᖃᓂᒃᑯᑦ, ᐅᓪᓗᐊᑉ ᕿᑎᐊᒍᑦ ᐊᒻᒪᓗ ᐃᒃᑭᕐᒥᑦ. 

ᑕᕝᕚᑭᒦᑦᑐᒥ ᐅᐃᕆᓐᓇᖅᑐᖅ ᓴᓇᓯᒪᔪᓂᑦ: ᑕᒪᒃᑯᐊ ᓴᓇᓯᒪᔪᑦ ᑐᓂᓯᕙᒃᐳᑦ ᑕᕝᕚᑭᒦᑦᑐᒥ ᐅᐃᕆᓐᓇᖅᑐᒥᑦ ᖃᕋᓴᕐᒧᑦ. ᐃᓚᖃᖅᐳᑦ:

  • E-ᓯᒡᒐᓕᐊᑦ. ᐊᑐᓲᖑᕗᑦ ᐴᖑᔪᓂᑦ ᐃᓗᓕᓕᖕᓂᑦ ᑕᕝᕚᑭᒦᑦᑐᒥ ᐅᐃᕆᓐᓇᖅᑐᓂᑦ, ᑎᐱᓕᖕᓂᑦ ᐊᒻᒪᓗ ᐃᓚᐅᕈᑎᒃᓴᓂᑦ. e-ᓯᒡᒐᓕᐊᑦ ᐊᑐᓲᖑᕗᑦ ᕚᑕᓖᓂᑦ ᐃᑭᑎᑦᑎᓂᕐᒧᑦ ᑕᕝᕚᑭᒦᑦᑐᒥ ᐅᐃᕆᓐᓇᖅᑐᓂᑦ ᐊᒻᒪᓗ ᐊᓯᖏᓐᓂ ᐃᓚᐅᕈᑎᒃᓴᓂᑦ ᐳᔪᙳᖅᖢᓂ, ᓂᐅᖅᑕᐅᕙᒃᖢᓂ.

ᐊᒥᓱᐃᑦ ᑖᒃᑯᓇᓂ ᑕᕝᕚᑭᒦᑦᑐᒥ ᐅᐃᕆᓐᓇᖅᑐᖅ ᓴᓇᓯᒪᔪᓂᑦ ᑎᐱᑎᖅᓯᒪᕗᑦ ᓱᕕᐅᑉᓇᖅᑐᓂᑦ, ᓰᕐᓇᖅᑐᓂ ᐱᕈᖅᑐᕕᓂᕐᓂ ᐊᒻᒪᓗ ᓄᖑᓴᒐᕐᒥᑦ ᒪᒃᑯᒃᑐᐃᑦ ᐱᐅᒃᓴᒐᔪᖕᒪᑕ ᑎᐱᐅᔪᓂᑦ. ᐱᔪᒥᓇᖅᓯᑎᑦᑎᒃᑲᓐᓂᓲᖑᕗᑦ ᓱᐴᖅᑐᖃᑦᑕᓕᕐᓂᕐᒧᑦ, ᑐᕌᖅᑎᑦᑎᔪᓐᓇᖅᑐᒥᑦ ᐅᐃᕆᓯᒪᓂᐅᔪᒥᑦ.