ᕿᑭᖅᑕᓂ ᐋᓐᓂᐊᕕᒃ ᑕᕝᕚᑭᓄᑦ ᓱᐴᖅᑐᕐᓇᙱᑦᑐᓄᓪᓗ ᐱᓕᕆᐊᒃᓴᖅ

ᕿᑭᖅᑕᓂ ᐋᓐᓂᐊᕕᒃ ᑕᕝᕚᑭᓄᑦ ᓱᐴᖅᑐᕐᓇᙱᑦᑐᓄᓪᓗ ᐱᓕᕆᐊᒃᓴᖅ

ᕿᑭᖅᑕᓂ ᐋᓐᓂᐊᕕᒃ (QGH) ᐊᑐᓕᖅᑎᑦᑎᓇᓱᒃᑐᑦ ᑕᕝᕚᑭᓄᑦ ᓱᐴᖅᑐᓐᓇᙱᑦᑐᓄᓪᓗ ᒪᓂᖅᑲᓂ ᐊᑐᓕᖅᑎᑦᑎᓂᕐᓂ ᐃᑲᔪᖅᓱᕐᓗᒍ ᐋᓐᓂᐊᖃᕐᓇᙱᑦᑐᓕᕆᓂᖅ ᖃᓄᐃᙱᑦᑎᐊᖁᔨᓂᕐᓗ ᓄᓇᕗᒻᒥᐅᓄᑦ ᓴᐳᒻᒥᓗᒋᓪᓗ ᐋᓐᓂᐊᕕᖕᒦᑦᑐᑦ, ᐳᓛᖅᑐᑦ ᐃᖅᑲᓇᐃᔭᖅᑎᓪᓗ ᓴᖅᑭᔮᖅᑐᓄᑦ ᓱᐴᖅᑐᕐᓂᕐᓄᑦ. 

ᐱᒋᐊᕐᓗᓂ ᔫᓂ 30, ᐃᖅᑲᓇᐃᔭᖅᑎᓕᒫᑦ, ᐋᓐᓂᐊᕕᓕᐊᖅᓯᒪᔪᑦ ᐳᓛᖅᑐᓪᓗ ᓱᐴᖅᑐᓲᑦ ᑕᕝᕚᑭᓂᒃᓘᓐᓃᑦ ᐱᖁᑎᖏᓐᓂ ᐊᑐᕆᐊᖃᕐᓂᐊᖅᑐᑦ ᓇᓗᓇᐃᖅᑕᐅᓯᒪᔪᒥᒃ ᐊᕙᑎᖏᓐᓂ ᕿᑭᖅᑕᓂ ᐋᓐᓂᐊᕕᖕᒥ, ᐊᑕᐅᓯᖅ ᐃᓂᖃᖅᑐᖅ ᓴᓂᐊᓂ ᐋᓐᓂᐊᕕᐅᑉ ᐱᖃᑖᓗ ᐃᓂᖃᖅᑐᖅ ᕿᑎᐊᓂ ᐊᑯᓐᓂᖓᓂ ᓄᑕᐅᙱᑦᑑᑉ ᐋᓐᓂᐊᕕᐅᑉ ᐊᒻᒪ ᓄᑖᖑᕆᐊᖅᑕᐅᔫᑉ ᐋᓐᓂᐊᕕᐅᑉ ᓱᓗᖓᓂ.  

ᑕᕝᕚᑮᑦ ᐱᖁᑎᖏᑦ ᐊᑐᕐᓗᒋᑦ ᓇᓗᓇᐃᖅᑕᐅᓯᒪᔪᒥᒃ ᐊᕙᑎᖏᓐᓂ ᐃᓚᐅᑎᑦᑎᔪᑦ ᓯᒡᒐᓕᐊᓂᑦ, ᓯᒡᒑᓂᑦ, ᓯᒡᒑᕋᓛᓂᑦ, ᑕᕝᕚᑭᓂᑦ ᑕᒧᐊᔭᒐᐃᑦ, ᓱᐴᖅᑑᑎᑦ ᐊᒻᒪ ᓯᒡᒐᓕᐊᙳᐊᑦ. 

ᕿᑭᖅᑕᓂ ᐋᓐᓂᐊᕕᒃ ᐱᑎᑦᑎᓂᐊᖅᑐᖅ ᑖᒃᑯᐊᑐᐊᖑᙱᑦᑐᓂᒃ ᓇᓗᓇᐃᖅᑕᐅᓯᒪᔪᑦ ᐊᕙᑎᖏᓐᓂ ᑕᕝᕚᑭᑐᕐᓂᕐᓄᑦ ᓱᐴᖅᑐᕐᓂᕐᓄᓪᓗ, ᑭᓯᐊᓂᑦᑕᐅᖅ ᐃᓕᓐᓂᐊᖅᑎᑦᑎᓂᐊᖅᑐᑦ ᑎᓕᐅᕆᓗᑎᒃᓗ ᑕᕝᕚᑭᓄᑦ ᓄᖅᑲᕋᓱᖕᓂᕐᒥᑦ ᐱᑎᑦᑎᓂᒃᑯᑦ ᐊᔾᔨᒌᖏᑦᑐᓂᒃ ᐃᑲᔪᕈᑎᓂᑦ.

ᓯᒡᒐᓕᐊᑦ ᐃᓗᐊᓃᑦᑐᓂ ᓂᑯᑏᓐᒥ ᑭᖑᕝᕕᖅᑎᑦᑎᓂᕐᒥ ᒪᒥᓴᐃᓂᖅ  ᐱᑎᑕᐅᔪᒃᓴᐅᑕᐅᓗᑎᒃ ᐋᓐᓂᐊᕕᓕᐊᖅᓯᒪᔪᓄᑦ ᐃᖅᑲᓇᐃᔭᖅᑎᓄᓪᓗ ᐱᔪᒪᔪᓄᑦ ᓄᖅᑲᕐᓂᕐᒥᒃ, ᐱᑎᒋᐊᕐᓗᒋᑦ ᐋᓐᓂᐊᕕᖕᒥ ᐊᕙᑎᒦᓐᓂᕐᒥ ᐊᑦᑕᕐᓇᖅᑐᒦᖏᓐᓂᕐᒥ ᐃᖢᕐᕆᓐᓇᕐᓗᓂᓗ. ᐃᓅᓯᓕᕆᓂᖅ ᐱᑎᑕᐅᓇᔭᕐᒥᔪᖅ ᓱᐴᖅᑐᖃᑦᑕᕈᓐᓃᖅᑎᑦᑎᔨᒧᑦ ᐋᓐᓂᐊᕕᖕᒥ ᐃᖅᑲᓇᐃᔭᖅᑎᒻᒪᕆᖕᓄᑦ. 

  ᐃᓕᑦᑎᒃᑲᓐᓂᕈᒪᓗᓂ ᖃᓄᖅ ᐃᑲᔪᖅᑕᐅᓇᔭᕐᒪᖔᖅᐱᑦ ᑭᓇᓘᓐᓃᑦ ᖃᐅᔨᒪᔭᑦ ᓄᖅᑲᕐᓗᓂ ᑕᕝᕚᑭᑐᕐᓂᕐᒥ, ᓇᕿᓪᓗᒍ ᐅᓇ.