ᑕᕝᕚᑭᒥᑦ-ᐊᑐᙲᓐᓇᕐᓗᓂ ᓯᖓᐃᓂᕐᓂᑦ

ᑕᕝᕚᑭᒥᑦ-ᐊᑐᙲᓐᓇᕐᓗᓂ ᓯᖓᐃᓂᕐᓂᑦ

ᐊᒥᓱᓂᒃ ᐱᔾᔪᑎᑕᖃᐅᖅᐳᖅ ᓄᖅᑲᕐᓂᕐᒧᑦ ᓱᐴᖅᑐᕐᓂᕐᒥᑦ. ᑕᒪᓐᓇ ᓱᓕᓗᐊᖅᐳᖅ ᓯᖓᐃᒍᕕᑦ ᐅᕝᕙᓘᓐᓃᑦ ᐃᕕᐊᖏᒃᑯᑦ ᐊᒫᒪᒃᑎᑦᑎᒍᕕᑦ. ᓄᖅᑲᕐᓂᖅ ᓄᑕᕋᓛᕐᓂᑦ ᐃᑲᔪᕈᓐᓇᖅᐳᖅ:

  • ᐃᓅᓂᕐᒧᑦ ᓈᒻᒪᒃᓯᒃᐸᑦ (ᐃᓄᖅᓴᙱᓪᓗᓂ);

  • ᐃᓅᓗᓂ ᓈᒻᒪᒃᑐᒥ ᐅᖁᒪᐃᓐᓂᖃᕐᓗᓂ (ᒥᑭᓗᐊᙱᓪᓗᓂ);

  • ᐊᑦᑎᖕᓂᖅᓴᒥᑦ ᐅᓗᕆᐊᓇᕐᓂᖓᓂ ᓄᑕᕋᓛᖅ ᓯᓂᒃᖢᑎᒃ ᐃᓅᔪᓐᓃᖃᑦᑕᕐᓂᖏᓐᓂᑦ (SIDS);

  • ᐊᑦᑎᖕᓂᖅᓴᒥᑦ ᐅᓗᕆᐊᓇᕐᓂᖓᓂ ᐊᓂᖅᓵᖅᑐᕈᑎᖏᑦ ᒥᑭᒡᓕᓯᒪᓂᕐᒥᑦ; ᐊᒻᒪᓗ

  • ᐊᑦᑎᖕᓂᖅᓴᒥᑦ ᐅᓗᕆᐊᓇᕐᓂᖓᓂ ᓯᐅᓯᕆᕙᖕᓂᕐᒥᑦ.

ᐱᐅᓂᖅᐹᖑᔪᖅ ᐱᓕᕆᔪᓐᓇᖅᑕᕐᓂ ᓄᑕᕋᓛᕐᓄᑦ ᓱᐴᖅᑐᖃᖅᑕᕈᓐᓃᑦᑎᐊᒻᒪᕆᒡᓗᓂ. ᐊᑖᓂ ᐃᑲᔪᕈᑎᒃᓴᐅᕗᑦ ᐃᓕᖕᓂᑦ ᐃᑲᔪᕈᓐᓇᖅᑐᓂᑦ.

ᓄᓇᕗᒻᒥ ᓄᖅᑲᕐᓂᕐᒧᑦ ᐅᖃᓗᒡᕕᒃᓴᑦ ᐃᑲᔪᖅᑐᐃᔨᑦ

ᑕᒪᒃᑯᐊ ᐃᑲᔪᖅᑐᐃᔨᑦ ᐊᑐᐃᓐᓇᐅᑎᑦᑎᔪᓐᓇᖅᐳᑦ ᐃᑲᔪᖅᓱᐃᓂᕐᒥᑦ ᐊᒻᒪᓗ ᐅᖃᐅᔾᔨᓂᕐᒥᑦ. ᐱᔨᑦᑎᕋᕐᓂᐅᔪᑦ ᐊᑭᖃᙱᓚᑦ ᐊᒻᒪᓗ ᐊᓯᒥᒃ ᑐᓴᖅᑕᐅᔭᕆᐊᖃᙱᖦᖢᑎᒃ. ᐊᑐᐃᓐᓇᐅᕗᑦ ᐃᓄᒃᑎᑐᑦ, ᐃᓄᐃᓐᓇᖅᑐᓐ, ᖃᓪᓗᓈᑎᑐᑦ ᐊᒻᒪᓗ ᐅᐃᕖᑎᑐᑦ. ᐅᖃᓗᑐᐃᓐᓇᕐᓗᑎᑦ ᐊᑭᖃᙱᑦᑐᒧᑦ: 1-866-3NU-ᓄᖅᑲᕐᓂᕐᒧᑦ (368-7848).

ᐃᓚᑎᑦ ᐊᒻᒪᓗ ᐱᖃᓐᓇᕆᔭᑎᑦ

ᐃᓱᒪᓂᑦᑎᐊᕚᓘᕗᖅ ᐱᖃᑎᖃᕐᓂᕐᒥᑦ ᐱᖃᓐᓇᕆᔭᕐᓂ ᐅᕝᕙᓘᓐᓃᑦ ᐃᓚᒋᔭᕐᓂ ᓱᐴᖅᑐᖅᐸᙱᑦᑐᒥᑦ. ᐳᓛᖅᓯᒪᑦᑎᐊᕐᓂᖅ ᐃᓕᖕᓂᑦ ᐃᑲᔪᕈᓐᓇᖅᐳᖅ ᓵᓚᖃᕐᓂᕐᒥᑦ ᐊᒃᓱᕈᕐᓇᓛᖑᔪᒥᑦ ᐱᔪᒪᓂᐊᓗᖕᓂᑦ!

ᑕᕝᕚᑭᒦᑦᑐᒥ ᐅᐃᕆᓐᓇᖅᑐᖅ ᐃᓇᖏᖅᓯᓂᕐᒧᑦ ᐃᓅᓕᓴᐃᓂᖅ ᐊᒻᒪᓗ ᓘᒃᑖᒧᑦ ᑐᓂᔭᐅᔪᓄᑦ ᐃᓅᓕᓴᐅᑎᑦ

ᑕᒪᒃᑯᐊ ᓴᓇᓯᒪᔪᑦ ᐃᓕᖕᓂ ᐃᑲᔪᕈᓐᓇᖅᐳᑦ ᓄᖅᑲᕐᓂᕐᒧᑦ. ᐅᖃᖃᑎᒋᓗᒍ ᐋᓐᓂᐊᖃᖅᑕᐃᓕᒪᑎᑦᑎᓂᕐᒧᑦ ᐸᖅᑭᔨᐅᔪᑦ ᐃᓕᖕᓂ ᐃᑲᔪᕐᓂᐊᖅᑐᒥᑦ ᐱᐅᓛᖑᔪᒥᑦ ᐃᓅᓕᓴᕈᑎᒋᓂᐊᖅᑕᕐᓂᑦ ᓂᕈᐊᒐᒃᓴᐅᔪᓂᑦ.

ᐃᓄᐃᑦ ᐋᓐᓂᐊᖃᖅᑕᐃᓕᒪᑎᑦᑎᓂᖅ ᐊᑑᑎᖃᖅᐳᖅ

ᐃᓄᐃᑦ ᐋᓐᓂᐊᖃᖅᑕᐃᓕᒪᑎᑦᑎᓂᖅ ᐊᑑᑎᖃᖅᐳᖅ ᐱᒋᐊᕈᑕᐅᕗᖅ ᓄᑖᓄᑦ ᐊᒻᒪᓗ ᕿᑐᙵᒃᓴᓕᖕᓄᑦ ᐃᓄᖕᓂ ᐃᓚᒌᖑᔪᓄᑦ, ᐱᐅᓯᒋᐊᖅᑎᑦᑎᓂᕐᒧᑦ ᐋᓐᓂᐊᖃᖅᑕᐃᓕᒪᑎᑦᑎᓂᕐᒥᑦ ᐊᒻᒪᓗ ᖃᓄᐃᙱᑦᑎᐊᕐᓂᐅᔪᒥᑦ ᖁᕕᐊᓲᑎᖃᖅᑎᓪᓗᒋᑦ ᐱᖅᑯᓯᑐᖃᖅᑎᒍᑦ ᐃᓄᐃᑦ ᐃᓕᖅᑯᓯᖓᓐᓂ. ᓇᕿᓪᓗᒍ ᐅᕘᓇ ᐊᑑᑎᖃᖅᑐᓂᑦ ᐃᑲᔪᕈᑕᐅᔪᓄᑦ ᓱᓇᒃᑯᑖᓄᑦ.

ᐸᐅᒃᑑᑎᑦ- ᐃᓄᐃᑦ ᐊᕐᓇᐃᑦ ᑲᓇᑕᒥ

ᐸᐅᒃᑑᑎᑦ ᓴᖅᑭᑎᑦᑎᓯᒪᕗᑦ ᓄᑖᒥᑦ ᐱᓕᕆᐊᖑᔪᒥᑦ ᑕᐃᔭᐅᔪᒥᑦ "ᐊᑏ ᒥᒃᖠᒋᐊᖅᑎᑦᑎᒋᑦ ᐊᓯᒥᒃ-ᓱᐴᖅᑐᖅᑎᒥᑦ ᐳᔪᖓᓂ," ᓯᖓᐃᔪᓄᑦ ᐊᕐᓇᓄᑦ ᓱᐴᖅᑐᖅᐸᒃᑐᓄᑦ.