ᓄᖅᑲᕐᓂᕐᒧᑦ ᐃᑲᔪᕈᑕᐅᔪᑦ

ᓄᖅᑲᕐᓂᕐᒧᑦ ᐃᑲᔪᕈᑕᐅᔪᑦ

ᐊᓯᔾᔨᕐᓗᒍ ᐊᕙᑎᒋᔭᐃᑦ

ᐱᔭᒃᓴᖃᐃᓐᓇᖅᐸᒡᓗᑎᑦ

  • ᐱᔪᒪᓂᐊᓗᐃᑦ ᖃᔅᓯᐊᕐᔪᖕᓂ ᒥᓂᑦᓂ ᐊᑯᓂᐅᑎᒋᓲᑦ. ᑕᐃᒫᒃ, ᐱᔪᒪᓂᐊᓗᐃᑦ ᑎᑭᒃᑳᖓᑕ, ᐊᓯᐊᓂᑦ ᐱᓕᕆᓗᑎᑦ!

  • ᐃᒥᖅᑐᒐᔪᒡᓗᑎᑦ. ᓱᒃᑲᐃᓪᓗᑎᑦ ᐃᒥᕋᔮᖅᐸᒡᓗᑎᑦ. ᐃᒥᖅᑕᐃᑦ ᖃᓂᕐᓃᑎᓚᐅᑲᒡᓗᒍ ᕿᓚᒥᕈᓗᒃ.

  • ᐆᒻᒪᕇᓐᓇᖅᐸᒡᓗᑎᑦ. ᑲᒥᒡᓗᑎᑦ ᐊᒻᒪᓗ ᓯᓚᒥᑦ ᐊᓃᕐᓗᑎᑦ ᐅᕝᕙᓘᓐᓃᑦ ᐃᓄᒃᑎᑐᑦ ᒧᒥᕆᐊᖅᑐᕐᓗᑎᑦ ᐱᙳᐊᕐᕕᖕᒥᑦ ᐱᖃᓐᓇᕆᔭᖃᑎᓪᓗ.

  • ᐊᒡᒐᑎ ᐱᓕᕆᑏᓐᓇᕐᓗᒋᑦ - ᒥᖅᓱᕐᓗᑎᑦ, ᒪᑭᑦᑕᕐᓗᑎᑦ ᐅᕝᕙᓘᓐᓃᑦ ᐃᖃᓪᓕᐊᕆᐊᕐᓗᑎᑦ.

ᑕᓚᕖᓴᒃᑯᑦ ᐊᓕᐊᓇᐃᒋᓛᑦ ᓴᖅᑭᑎᓪᓗᒍ ᐊᒻᒪᓗ ᐃᒡᓚᒪᔪᒡᓗᑎᑦ.

ᐃᖅᑲᐅᒪᓗᒋᑦ ᑎᓴᒪᐃᑦ D-ᖑᔪᑦ ᐱᔪᒪᓂᖃᓕᕌᖓᕕᑦ:

  • ᑭᖑᕙᕆᐊᕐᓗᒍ 5 ᒥᓂᑦᓄᑦ.

  • ᐃᓗᑐᔪᒥᑦ ᐊᓂᖅᑎᕆᕙᒡᓗᑎᑦ.

  • ᐃᒥᕐᓗᑎᑦ ᐃᒪᕐᒥᑦ.

  • ᐅᓚᕕᓴᕐᓗᑎᑦ ᐃᓕᖕᓂᑦ (ᐊᓯᐊᓂᑦ ᐱᓕᕆᓗᑎᑦ).

ᐱᓕᕆᕙᒃᑕᑎᑦ ᐊᓯᔾᔨᖅᑕᕐᓗᒋᑦ

ᐃᓱᒪᒋᓚᐅᙱᑦᑎᐊᕐᓗᒍ, ᑭᓱᑐᐃᓐᓈᓗᐃᑦ ᓱᐴᖅᑐᕈᒪᓐᓇᖅᐳ ᐅᕝᕙᓘᓐᓃᑦ ᑕᒧᐊᓗᓂ. ᑕᕝᕚᑭ ᐊᖏᔫᓪᓗᓂ ᐃᓚᒋᔭᐅᓯᒪᕗᖅ ᖃᐅᑕᒫᒥᑦ ᐃᓅᓯᕆᔭᕐᓂᑦ ᐊᒻᒪᓗ ᓵᓚᖃᕐᓂᕐᒥᑦ ᐱᔪᒪᓂᐊᓗᖕᓂᑦ, ᐊᓯᔾᔨᖅᑕᕆᐊᖃᕐᓂᐊᖅᐸᑎᑦ ᖃᐅᑕᒫᑦ ᐱᓕᕆᐊᕆᕙᖅᑕᕐᓂ. ᐃᓱᒪᒋᓇᓱᐊᕐᓗᒍ ᐊᑐᖅᐸᖕᓂᕐᓂ ᑕᕝᕚᑭᒥᑦ.

  • ᐅᖃᓪᓚᖃᑎᖃᖅᑎᓪᓗᑎᑦ ᐅᖃᓘᑎᒃᑯᑦ? ᑎᑎᕋᐅᑎᒥᑦ ᑎᑎᕋᕐᕕᒃᓴᒥᓪᓗ ᖃᓂᒋᔭᕐᓃᑎᑦᑎᖔᖅᐸᒡᓗᑎᑦ ᐊᒻᒪᓗ ᑎᑎᕋᐅᔭᖔᕐᓗᑎᑦ. ᐅᕝᕙᓘᓐᓃᑦ, ᐅᖃᓘᑎᕋᓛᖃᕈᕕᑦ, ᐅᖃᓘᔮᕐᔪᒃᑎᓪᓗᑎᑦ ᐱᓱᖃᑕᖔᕐᓗᑎᑦ.

  • ᐅᓪᓗᕈᒻᒥᓴᓚᐅᖅᑎᓪᓗᑎᑦ ᐅᕝᕙᓘᓐᓃᑦ ᐅᓐᓄᐊᒃᑯᑦ ᓂᕆᐊᓂᒃᑯᕕᑦ? ᐃᒃᓯᕚᑐᐃᓐᓇᙱᓪᓗᑎᑦ ᑭᐳᒥᑦ ᑭᖑᓂᐊᒍᑦ. ᒪᑭᑲᐅᑎᒋᓗᑎᑦ ᓂᕐᕆᓯᓕᕆᓯᑲᐅᑎᒋᓗᑎᑦ ᐅᕝᕙᓘᓐᓃᑦ ᐊᓂᔭᖅᑐᕐᓗᑎᑦ.

  • ᐃᖃᓪᓕᐊᖅᑎᓪᓗᑎᑦ ᐅᕝᕙᓘᓐᓃᑦ ᐊᖑᓇᓱᒃᑎᓪᓗᑎᑦ? ᐊᑏ ᐱᑦᑕᐃᓕᒪᓚᐅᑲᒃᑭᑦ ᓯᕗᓪᓕᕐᓂ ᐱᓇᓱᐊᕈᓯᐅᔪᓂᑦ ᑭᓯᐊᓂ ᓴᙱᓂᖅᓴᐅᔫᔮᓕᕈᕕᑦ. ᐅᕝᕙᓘᓐᓃᑦ ᐊᐅᓪᓛᕈᕕᑦ, ᓇᒃᓴᙱᓪᓗᑎᑦ ᑕᕝᕚᑭᒥᑦ.

  • ᖁᙱᐊᖑᔮᕐᔪᒃᑎᓪᓗᑎᑦ ᑕᐅᑐᒐᔪᒃᑕᕐᓂ ᑕᓚᕖᓴᒥᑦ? ᑕᐅᑐᒐᓱᐊᕆᑦ ᑕᓚᕖᓴᒥᑦ ᐊᓯᐊᓂᑦ ᐃᒃᓯᕙᐅᑕᕐᒥᑦ, ᐅᕝᕙᓘᓐᓃᑦ ᐊᓯᐊᓂᑦ ᓄᑖᒥᒃ ᑕᐅᑐᖔᕋᓱᐊᕐᓗᑎᑦ.

  • ᐃᖏᕐᕋᐅᔮᕐᔪᒃᑎᓪᓗᑎᑦ ᐃᖅᑲᓇᐃᔭᕆᐊᕐᓗᑎᑦ? ᐊᑐᕆᐊᕐᓗᑎᑦ ᐊᓯᐊᒎᖅᑐᒥᑦ ᐃᖅᑲᓇᐃᔭᕆᐊᖅᑎᓪᓗᑎᑦ.

ᐃᓕᖕᓂᑦ ᐊᒃᓱᕈᖅᑎᑦᑎᓗᐊᖅᑕᐃᓕᒋᑦ

ᐃᓛᓐᓂᒃᑯᑦ ᒥᓗᒃᓯᐊᕐᔪᖃᑦᑕᑐᐃᓐᓇᕆᐊᖃᖅᑐᑎᑦ, ᑭᓯᐊᓂ ᐃᓕᖕᓂᑦ ᓂᑲᒋᔾᔫᒥᓗᑎᑦ. ᐆᒃᑐᕋᓱᐃᓐᓇᖅᖢᓂ ᐱᐅᓯᑎᑦᑎᐊᖅᓯᔪᓐᓇᖅᐳᖅ, ᓄᖅᑲᑐᐊᕌᖓᕕᑦ, ᓄᑖᒥᑦ ᐃᓕᑦᑎᕙᓪᓕᐊᕗᑎᑦ. ᐃᓕᑕᕐᓂᑦ ᐃᓕᖕᓄᑦ ᐃᑲᔪᕐᓂᖃᕐᓂᐊᖅᐳᖅ ᑭᖑᓪᓕᕐᒥᑦ!

ᐃᓕᖕᓂᑦ ᐅᑎᖅᑎᒋᐊᖅᐸᒡᓗᑎᑦ ᐱᓕᕆᐊᕆᓇᓱᐊᖅᑕᕐᓄᑦ

ᒥᓗᒃᓯᑲᑕᒃᑯᕕᑦ, ᐃᓕᖕᓂᑦ ᐅᑎᖅᑎᒋᐊᖅᐸᒡᓗᑎᑦ ᐱᓕᕆᐊᕆᓇᓱᐊᖅᑕᕐᓄᑦ:

  • ᑕᑯᓗᒋᑦ ᒥᓗᒃᓯᑲᑕᖕᓂᕆᔭᑎᑦ ᒥᑭᑦᑑᔪᒥᑦ ᐅᑎᕆᐊᕐᓂᐅᔪᒥᑦ. ᐃᓕᖕᓂᑦ ᓂᑲᒋᓗᑎᑦ.

  • ᖃᐅᔨᓇᓱᐊᕆᑦ ᑭᓱᒧᑦ ᐱᔾᔪᑎᖃᓚᐅᕐᓂᖓᓂ ᒥᓗᒃᓯᑲᑕᖕᓂᐅᔪᒥᑦ. ᐱᑦᑕᐃᓕᒪᔪᓐᓇᖅᑕᐃᑦ “ᐱᔪᒪᓂᐅᔪᖅ” ᑭᖑᓪᓕᕐᒥᑦ.

  • ᐲᓐᓇᕋᓱᒋᑦ ᐃᑲᔪᖅᓯᖅᑕᐅᓂᕐᒥᑦ ᐊᓯᖕᓂᑦ. ᐅᖃᖃᑎᖃᖃᑦᑕᕆᑦ ᐃᓚᑎᑦ, ᐱᖃᓐᓇᕆᔭᑎᑦ ᐊᒻᒪᓗ ᓄᓇᖅᑲᑎᐅᖃᑎᑎᑦ. ᐅᖃᓪᓚᖃᑎᒋᔪᓐᓇᕐᒥᔭᐃᑦ ᓄᓇᓕᖕᓂ ᐋᓐᓂᐊᖃᖅᑕᐃᓕᒪᑎᑦᑎᓂᕐᒧᑦ ᐃᓗᐊᖅᓴᐃᔨᐅᔪᖅ, ᓘᒃᑖᒥᑦ ᐅᕝᕙᓘᓐᓃᑦ ᓄᖅᑲᕐᓂᕐᒧᑦ ᐃᑲᔪᖅᑎᐅᔪᒥᑦ.