ᓂᐱᑎᒐᖅ

ᓂᐱᑎᒐᖅ

ᓂᐱᑎᒐᖅ ᓂᐱᑎᑕᐅᕙᒃᐳᖅ ᐅᕕᓂᖕᓄᑦ ᒪᑦᑐᑎᑎᑐᑦ, ᓱᒃᑲᐃᑦᑐᒥ ᐊᓂᐊᑎᑦᑎᓗᓂ ᑕᕝᕚᑭᒦᑦᑐᒥ ᐅᐃᕆᓐᓇᖅᑐᒥᑦ ᑎᒥᖕᓄᑦ. ᐊᓂᐊᑎᑦᑎᕙᓪᓕᐊᖏᓐᓇᕐᓂᐅᔪᖅ ᑕᕝᕚᑭᒦᑦᑐᒥ ᐅᐃᕆᓐᓇᖅᑐᒥᑦ ᒥᒃᖠᑎᑦᑎᕗᖅ ᓄᖅᑲᕐᓂᕐᒧᑦ ᐋᓐᓂᐊᕈᑕᐅᖃᑦᑕᖅᑐᓂᑦ ᐊᒻᒪᓗ ᐱᔪᒪᓂᐊᓗᖕᓂᑦ.

ᐱᖓᓱᓂᑦ ᐊᔾᔨᒌᙱᑦᑐᓂᑦ ᓴᙱᓂᖃᖅᐳᑦ ᓂᐱᑎᒐᕐᓂᑦ. ᐊᑐᕐᓂᐊᖅᑕᐃᑦ ᒪᓕᖕᓂᖃᖅᐳᖅ ᖃᓄᑎᒋ ᓱᐴᖅᑐᖅᐸᖕᓂᕐᓂᑦ. ᐋᓐᓂᐊᖃᖅᑕᐃᓕᒪᑎᑦᑎᓂᕐᒧᑦ ᐸᖅᑭᔨᒋᔭᐃᑦ ᐃᑲᔪᕈᓐᓇᖅᐳᖅ ᓂᕈᐊᖅᓯᓂᕐᒥᑦ ᓈᒻᒪᓛᒥᑦ ᓂᐱᑎᒐᕐᒥᑦ.

ᐊᑐᓪᓗᐊᖅᐳᑎᑦ ᓂᐱᑎᒐᕐᒥ 8-ᓂᑦ 10-ᓄᑦ ᐱᓇᓱᐊᕈᓯᕐᓄᑦ. ᐊᑐᕈᓐᓇᖅᐸᐃᑦ ᓂᐱᑎᒐᖅ ᐊᓯᖏᓐᓂ ᑕᕝᕚᑭᒦᑦᑐᒥ ᐅᐃᕆᓐᓇᖅᑐᓂᑦ ᐃᑲᔪᕈᑕᐅᔪᓂᑦ ᓴᓇᓯᒪᔪᓂᑦ (ᓲᕐᓗ ᑕᒧᐊᔭᒐᖅ), ᐊᒻᒪᓗᑦᑕᐅᖅ ᐃᓚᖏᓐᓂ ᐊᓯᖏᓐᓂᑦ ᓄᖅᑲᕐᓂᕐᒧᑦ ᐃᓅᓕᓴᐅᑎᓂᑦ.

ᖃᓄᖅ ᐊᑐᖅᑕᐅᓲᖑᓂᖓᓂ ᓂᐱᑎᒐᖅ:

  • ᐃᓕᓗᒍ ᓂᐱᑎᒐᖅ ᓴᓗᒪᔪᒧᑦ, ᒥᖅᑯᖃᙱᓐᓂᐅᔪᒧᑦ. ᐅᕕᓂᖕᒧᑦ ᕿᑎᖅᐱᑦ ᖁᓛᒍᑦ ᐅᕝᕙᓘᓐᓃᑦ ᖁᑦᑎᖕᓂᖅᓴᒧᑦ ᓯᓚᑖᓅᖓᔪᒥᑦ ᑕᓕᕐᒧᑦ. ᐃᓕᓪᓗᐊᖅᐸᐃᑦ ᐊᑐᓂ ᓂᐱᑎᒐᑦ ᐊᓯᐊᓄᑦ ᐃᓂᐅᔪᒧᑦ.

  • ᑐᓄᐊᓃᑦᑐᖅ ᐲᕐᓗᒍ.

  • ᓇᕿᓪᓗᒍ ᓂᐱᑎᒐᖅ ᐅᕕᓂᖕᓄᑦ 10 ᓴᑲᓪᓄᑦ.

  • ᐊᑐᕐᓗᑎᑦ ᓂᐱᑎᒐᕐᒥᑦ ᐃᑲᕐᕋᓄᑦ 24-ᓄᑦ.

  • ᓯᓂᑦᑎᐊᕈᓐᓇᙱᒃᑯᕕᑦ, ᓂᐱᑎᒐᖅ ᐲᕐᓗᒍ ᓯᓂᖕᓇᐅᓕᕌᖓᑦ ᐊᒻᒪᓗ ᓄᑖᒥᒃ ᐃᓕᓯᓗᑎᑦ ᐅᓪᓛᒃᑯᑦ.

  • ᐊᒡᒐᑎᑦ ᐅᐊᓴᖅᐸᒡᓗᒋᑦ ᓯᕗᓂᐊᓂ ᐊᒻᒪᓗ ᑭᖑᓂᐊᒍᑦ ᐱᓕᕆᓂᖃᓚᐅᖅᑎᓪᓗᑎᑦ ᓂᐱᑎᒐᕐᒥᑦ.

ᐅᖃᖃᑎᖃᕐᓗᑎᑦ ᓄᓇᓕᖕᓂ ᐋᓐᓂᐊᖃᖅᑕᐃᓕᒪᑎᑦᑎᓂᕐᒧᑦ ᐃᓗᐊᖅᓴᐃᔨᒧᑦ ᐅᕝᕙᓘᓐᓃᑦ ᓘᒃᑖᒧᑦ ᐊᑐᓚᐅᙱᓐᓂᕐᓂᑦ ᓂᐱᑎᒐᕐᒥ ᐃᒪᐃᒃᑯᕕᑦ:

  • ᓯᖓᐃᒍᕕᑦ ᐅᕝᕙᓘᓐᓃᑦ ᐃᕕᐊᖏᒃᑯᑦ ᐊᒫᒪᒃᑎᑦᑎᒍᕕᑦ;

  • ᐃᓅᓕᓴᖅᑕᐅᒍᕕᑦ ᐱᒻᒪᕆᐅᔪᒧᑦ ᐆᒻᒪᑎᒧᑦ ᖃᓄᐃᓐᓂᐅᔪᒧᑦ;

  • ᐆᒻᒪᓯᕆᓚᐅᖅᓯᒪᒍᕕᑦ ᐅᕝᕙᓘᓐᓃᑦ ᓄᑮᖅᑎᑦᑐᒧᑦ ᐱᓇᓱᐊᕈᓯᐅᓚᐅᖅᑐᓂ ᒪᕐᕉᖕᓂᑦ; ᐅᕝᕙᓘᓐᓃᑦ

  • ᐊᑐᖃᑦᑕᕐᓗᑎᑦ ᓘᒃᑖᒧᑦ ᑐᓂᔭᐅᓂᑯᒥᑦ ᐃᓅᓕᓴᐅᑎᓂᑦ ᖃᐅᑕᒫᑦ.

ᓱᐴᖅᑐᕐᓂᖅ ᐊᓯᔾᔩᕙᒃᐳᑦ ᐊᒃᑐᐃᓂᐅᔪᓂᑦ ᐃᓚᖏᓐᓂᑦ ᐃᓅᓕᓴᐅᑎᓂᑦ. ᓄᖅᑲᕈᕕᑦ ᓱᐴᖅᑐᕐᓂᕐᒥᑦ ᓘᒃᑖᑦ ᐋᖅᑭᒋᐊᖅᓯᔭᕆᐊᖃᑐᐃᓐᓇᕆᐊᓕᒃ ᐊᖏᓂᕆᔭᖏᓐᓂᑦ ᐃᓅᓕᓴᐅᑎᖕᓂᑦ. ᐱᒻᒪᕆᐅᓗᐊᖅᐳᖅ ᐃᒪᐃᒃᑯᕕᑦ:

  • ᑎᒥᖓ ᓱᑲᖃᓗᐊᓲᖅ;

  • ᖁᑦᑎᒃᑐᒥ ᐊᐅᑉ ᓯᖑᔭᕐᓂᖓᓂ;

  • ᐆᒻᒪᑎᒧᑦ ᐋᓐᓂᐊᕐᓇᒥᑦ; ᐅᕝᕙᓘᓐᓃᑦ

  • ᐱᕙᒡᓗᑎᑦ ᓄᑲᓪᓗᖓᑦᑕᐃᓕᓂᕐᒧᑦ ᐃᓅᓕᓴᐅᑎᓂᒃ, ᐃᓅᑉ ᖃᓄᐃᓐᓂᖓᓄᑦ ᓈᒻᒪᒃᓯᓕᖅᑎᕈᑎᓄᑦ ᐅᕝᕙᓘᓐᓃᑦ ᓯᓂᖕᓇᖅᑐᓂᑦ ᐄᔭᒐᖅᐸᒡᓗᑎᑦ.

ᓄᖅᑲᕐᓗᑎᑦ ᐊᑐᕐᓂᕐᒥᑦ ᓂᐱᑎᒐᒥᑦ ᐃᕐᙲᓐᓇᑲᐅᑎᒋ ᐊᒻᒪᓗ ᑕᑯᓗᑎᑦ ᓄᓇᓕᖕᓂ ᐋᓐᓂᐊᖃᖅᑕᐃᓕᒪᑎᑦᑎᓂᕐᒧᑦ ᐃᓗᐊᖅᓴᐃᔨᒥᑦ ᐅᕝᕙᓘᓐᓃᑦ ᓘᒃᑖᒥᑦ ᐃᒪᐃᒃᑯᕕᑦ:

  • ᖃᑎᒐᒃᑯᑦ ᐋᓐᓂᐊᕐᓂᖃᕈᕕᑦ;

  • ᑎᓪᓕᕐᓃᑦ ᑕᐃᒪᐃᑦᑎᐊᒋᒃᑯᓂ ᐅᕝᕙᓘᓐᓃᑦ ᐆᒻᒪᑎ ᓱᒃᑲᓕᓗᐊᖅᑐᒥᑦ ᑎᓪᓕᕐᓂᖃᕐᓗᓂ;

  • ᓂᐅᒃᑯᑦ ᐋᓐᓂᐊᕐᓂᕐᒥᑦ;

  • ᓈᙳᐃᓐᓇᕐᓂᐅᔪᒥᑦ; ᐅᕝᕙᓘᓐᓃᑦ

  • ᐊᒥᕐᓗᒃᑐᖅ ᐅᕝᕙᓘᓐᓃᑦ ᐱᖓᔭᖕᓂᖅ.

ᓂᐱᑎᒐᖅ ᐊᒃᑐᖅᑕᐅᓂᖃᖅᐳᑦ, ᐃᓚᖃᖅᖢᓂ:

  • ᓂᐊᖁᙳᓂᑦ,

  • ᐅᐃᔾᔭᙳᓂᖅ,

  • ᓯᓂᒍᓐᓇᑦᑎᐊᙱᓐᓂᐅᔪᖅ,

  • ᓈᙳᓂᖅ,

  • ᐅᖏᓚᒐᓚᖕᓂᕐᒥᑦ, ᐆᓇᒐᓚᒡᓗᓂ ᐊᒻᒪᓗ ᑲᑭᓚᓈᖅᑐᒥᑦ ᐅᕕᓂᒃᑯᑦ ᓯᕗᓪᓕᕐᒥ ᐃᑲᕐᕋᒥᑦ ᐊᑐᕐᓂᕐᒥᑦ ᓂᐱᑎᒐᕐᒥᑦ (ᑕᒪᓐᓇ ᓱᖏᐅᓐᓇᖅᐳᖅ), ᐊᒻᒪᓗ

  • ᐊᐅᐸᖅᓯᓂᖅ ᐅᕕᓂᖕᒥᑦ ᓂᐱᑎᒐᖅ ᐲᖅᑕᐅᒍᓂ.