ᕕᐊᕆᓂᒃᓚᐃᓐ

ᕕᐊᕆᓂᒃᓚᐃᓐ

ᕕᐊᕆᓂᒃᓚᐃᓐ (ᓵᒻᐱᒃᔅ™) ᐃᓅᓕᓴᐅᑎᐅᕗᑦ ᐃᓕᖕᓂ ᐃᑲᔪᕈᓐᓇᖅᑐᓂ ᓄᖅᑲᕐᓂᕐᒧᑦ ᑕᕝᕚᑭᒥᑦ. ᐱᔪᓐᓇᖅᑕᐃᑦ ᑭᓯᐊᓂ ᓘᒃᑖᒥᑦ ᐅᕝᕙᓘᓐᓃᑦ ᐃᓗᐊᖅᓴᐃᔨᒥᑦ ᐱᓕᕆᔨᐅᔪᒥᑦ ᐃᓅᓕᓴᐅᑎᒃᓴᒥᑦ ᑐᓂᓯᒍᓂ.

ᐊᑐᓪᓗᐊᙱᑦᑐᑎᑦ ᑕᕝᕚᑭᒦᑦᑐᒥ ᐅᐃᕆᓐᓇᖅᑐᓂᑦ ᐃᑲᔪᕈᑕᐅᔪᓂᑦ ᐊᑕᐅᑦᑎᒃᑯᑦ ᕕᐊᕆᓂᒃᓚᐃᓐᒥᑦ.

ᐊᑐᕐᓂᕐᒥᑦ ᕕᐊᕆᓂᒃᓚᐃᓐ:

  • ᑕᐃᒪᐃᒐᔪᒃᑯᒥ, ᐱᒋᐊᕋᔭᖅᑕᐃᑦ ᐊᑐᕐᓂᕐᒧᑦ ᐃᓅᓕᓴᐅᑎᒥᑦ ᐊᑕᐅᓰᕐᓗᒍ ᐅᓪᓗᓄᑦ ᐱᖓᓱᓄᑦ.

  • ᐱᓕᕐᓗᒍ ᒪᕐᕈᐃᖅᐸᒡᓗᒍ ᐅᓪᓗᕐᒥᑦ ᐱᓇᓱᐊᕈᓯᕐᓄᑦ 12-ᓄᑦ.

  • ᑕᒪᓐᓇ ᐃᓅᓕᓴᐅᑎ ᐱᖃᑦᑕᓪᓗᐊᖅᑕᐃᑦ ᓂᕆᑎᓪᓗᑎᑦ ᒥᒃᖠᒋᐊᖅᑎᑦᑎᓂᕐᒧᑦ ᓈᙳᓂᕐᒥᑦ.

  • ᐱᒋᐊᓪᓗᐊᖅᑕᐃᑦ ᑕᒪᓐᓇ ᐃᓅᓕᓴᐅᑎ ᐊᑕᐅᓯᕐᒥ ᐱᓇᓱᐊᕈᓯᕐᒥ ᓯᕗᓂᐊᓂ ᓄᖅᑲᕐᓂᕐᒧᑦ ᐅᓪᓗᖓᓂ.

ᐅᖃᐅᑎᓂᐊᖅᐸᐃᑦ ᐃᓗᐊᖅᓴᐃᔨᒥᑦ ᐅᕝᕙᓘᓐᓃᑦ ᓘᒃᑖᒥᑦ ᐃᒪᐃᒃᑯᕕᑦ:

  • ᓯᖓᐃᒍᕕᑦ ᐅᕝᕙᓘᓐᓃᑦ ᐃᕕᐊᖏᒃᑯᑦ ᐊᒫᒪᒃᑎᑦᑎᒍᕕᑦ;

  • ᓂᑲᓪᓗᖓᒍᕕᑦ ᐅᕝᕙᓘᓐᓃᑦ ᐊᓯᖏᓐᓂ ᖃᓄᐃᓐᓂᐅᔪᒥᑦ ᐃᓱᒪᒧᑦ ᐊᑲᐅᑦᑎᐊᙱᓐᓂᐅᔪᓂᑦ;

  • ᑕᖅᑐᒧᑦ ᐊᑲᐅᙱᓕᐅᕈᑎᖃᕈᕕᑦ; ᐅᕝᕙᓘᓐᓃᑦ

  • ᐊᓯᖏᓐᓂ ᐱᒍᕕᑦ ᓘᒃᑕᒃᑰᕆᐊᖃᖅᑐᒧᑦ ᐅᕝᕙᓘᓐᓃᑦ ᓘᒃᑕᒃᑰᕆᐊᖃᙱᑦᑐᑦ ᐃᓅᓕᓴᐅᑎᓂᑦ.

ᕕᐊᕆᓂᒃᓚᐃᓐ ᐊᒃᑐᖅᑕᐅᓂᖃᖅᐳᑦ, ᐃᓚᖃᖅᖢᓂ:

  • ᒥᕆᐊᙳᓂᖅ;

  • ᓯᓂᒍᓐᓇᑦᑎᐊᙱᓐᓂᖅ;

  • ᓱᖏᐅᓐᓇᙱᑦᑐᓂ ᓯᓐᓇᒃᑐᕐᓂᖅ; ᐊᒻᒪᓗ

  • ᓂᐊᖁᙳᓂᖅ.

ᑕᒪᓐᓇ ᐃᓅᓕᓴᐅᑎ ᐃᒃᐱᒍᓱᒃᑎᑦᑎᔪᓐᓇᖅᐳᖅ ᖁᒃᓴᓱᓂᕐᒥᑦ ᐅᕝᕙᓘᓐᓃᑦ ᓂᑲᓪᓗᖓᓂᕐᒥᑦ. ᐃᒃᐱᒍᓱᒃᑎᑦᑎᔪᓐᓇᕐᒥᔪᖅ ᐃᒻᒥᓂᒃ ᐋᓐᓂᕈᒪᓂᕐᒧᑦ ᐅᕝᕙᓘᓐᓃᑦ ᐊᓯᒥᓂᑦ. ᓄᖅᑲᕐᓗᑎᑦ ᐊᑐᕐᓂᕐᒧᑦ ᐃᓅᓕᓴᐅᑎᒥᑦ ᐃᕐᙲᓐᓇᑲᐅᑎᒋ ᓇᓕᐊᑐᐃᓐᓇᐃᑦ ᑕᐃᒪᐃᒃᑯᑎᒃ. ᐅᖃᖃᑎᖃᓪᓗᐊᖅᐳᑎᑦ ᐋᓐᓂᐊᖃᖅᑕᐃᓕᒪᑎᑦᑎᓂᕐᒧᑦ ᐸᖅᑭᔨᐅᔪᒧᑦ.