ᓯᒡᒐᓕᐊᖅᑐᖃᑦᑕᕐᓗᓂ ᐃᔨᐅᑉ ᑐᓂᐊᓃᑦᑐᖅ ᐱᐅᔪᓐᓃᖅᑕᐅᔪᓐᓇᕐᒪᑦ, ᑕᐅᔭᐅᔪᒥ “ᓂᑭᖃᕈᓐᓃᖅᐸᓪᓕᐊᓂᖅ” ᑕᐅᑐᒍᓐᓃᕈᑕᐅᓲᖑᓪᓗᓂ.

ᓴᐳᑎᓯᒪᔪᓐᓇᖅᑕᐃᓪᓕ ᓯᒡᒐᓕᐊᖅᑐᖃᑦᑕᕈᓐᓃᑎᐊᒻᒪᕆᒃᕕᑦ ᐊᖏᕐᕋᐃᓪᓗ ᓯᒡᒐᓕᐊᖅᑐᕐᕕᐅᖃᑦᑕᖏᒃᑯᓂ

ᓯᒡᒐᓕᐊᑦ ᐳᔪᐊ ᐱᔪᓐᓃᖅᑎᑦᑎᔪᓐᓇᕐᒪᑦ ᓱᕋᐃᓗᓂᓗ ᐃᒡᒋᐊᖅᐱᑦ ᑭᓱᖏᓐᓂᒃ, ᑕᒪᓐᓇᓗ ᐊᒃᑐᐊᖕᒪᑦ ᓯᐅᑎᕕᑦ ᓯᐅᑕᐅᔭᖑᐊᖏᓐᓂ. ᓯᐅᓯᕆᓕᕈᑕᐅᔪᓐᓇᕐᒪᑕ ᑐᓯᓚᓕᕈᑕᐅᓗᓂ ᑐᓵᔪᓐᓃᕈᑕᐅᓗᓂᓗ.

ᑕᒧᐊᑦᑐᐊᖃᑦᑕᕐᓂᖅ ᑕᑉᕚᑭᒥ ᓯᒡᒐᓕᐊᕐᑐᕐᓂᒧᑦ ᑭᖑᕝᕕᐅᑎᑦᓯᐊᒐᒃᓴᐅᖏᒻᒪᑦ! ᑕᒧᐊᑦᑐᐊᖃᑦᑕᕐᑐᑦ ᐊᕝᕙᓗᐊᖏᓐᓂ ᐅᓗᐊᖓᒍᑦ ᖃᓂᖓᒍᓪᓗ ᐋᓐᓂᐊᑖᒐᔪᖕᓂᖅᓴᐅᓲᑦ ᑕᒧᐊᑦᑐᐊᓲᖑᖏᑦᑐᓂᑦ.

ᑕᒧᐊᑦᑐᐊᓲᑦᑕᐅᖅ ᑭᒍᑎᖃᑦᑎᐊᕈᓐᓃᒐᔪᖕᓂᖅᓴᐃᑦ ᐊᒻᒪᓗ ᖃᓂᒃᑯᑦ ᐋᓐᓂᐊᕈᓯᕐᓂ ᐱᖃᒐᔪᖕᓂᖅᓴᐅᓪᓗᑎᒃ.

ᓲᖅ ᓱᕈᓯᑦ ᓂᑲᓇᕐᓂᖅᓴᐅᑕᖅᐸᑦ ᐃᓐᓇᐃᑦ ᐱᓗᐊᖅᑎᓐᓇᒋᓪᓕ?

• ᐊᓂᖅᓵᖅᑕᖏᑎᒍᑦ ᓂᐅᖅᑕᕐᓂᖅᓴᐅᖕᒪᑕ ᓯᒡᒐᓗᐊᑉ ᐳᔪᖓᓃᑦᑐᓂ ᓂᐅᖅᓯᓂᖅᓴᐅᓲᖑᕗᑦ ᑎᒥᖏᓪᓗ ᒥᑭᓐᓂᖅᓴᐅᓪᓗᑎᒃ.
• ᑎᒥᖓᑕ ᐅᓇᑕᐅᑎᖏᑦ ᓴᙲᓐᓂᕐᓴᐅᖕᒪᑕ
• ᑎᒥᖓᑕ ᐅᓇᑕᐅᑎᖏᑦ ᐅᐃᕆᖓᓗᐊᖏᒻᒪᑕ ᓱᓕ ᖃᓂᒪᔾᔪᑎᒐᓚᖕᓄᑦ
• ᐃᒻᒥᓂᒃ ᕿᒪᕉᑎᑐᐃᓐᓇᔭᖏᓐᓂᖅᓴᐅᖕᒪᑕ ᓯᒡᒐᓕᐊᖅᑐᕐᕕᐅᔪᓂ

ᐊᖓᔪᖄᕆᔭᐅᔪᑦ ᓯᒡᒐᓕᐊᖅᑐᓲᑦ ᕿᑐᕐᖓᖏᑦ ᐳᕝᕙᕆᒐᔪᖕᓂᖅᓴᐅᖕᒪᑕ ᓄᕙᒐᔪᖕᓂᖅᓴᐅᓪᓗᑎᒃᓗ ᐊᒻᒪᓗ ᐳᕙᖏᑎᒍᑦ ᐃᒻᒥᒐᔪᖕᓂᖅᓴᐅᓪᓗᑎᒃ ᐃᓅᓕᕋᑖᕐᓂᖏᓐᓂ ᐱᓇᓱᐊᕈᓯᖅ ᒪᕐᕉᖕᓂ, ᓯᒡᒐᓕᐊᖅᑐᖃᑦᑕᖏᑦᑐᑦ ᓴᓂᐊᓂ.

ᓯᒡᒐᓕᐊᕐᑐᕌᖓᕕᑦ, ᐆᒻᒪᑏᑦ ᐊᐅᓚᓂᕐᓴᐅᓕᖃᑦᑕᕐᒪᑦ ᑎᒡᓕᕐᓃᓪᓗ ᖃᕐᕙᕆᐊᓲᖑᓪᓗᓂ. ᑎᒡᓕᕐᓃᑦ ᖁᕝᕙᓯᓗᐊᓕᕐᐸᑦ ᑕᖃᑎᑦ ᐱᐅᔪᓐᓃᕐᐸᓪᓕᐊᔪᓐᓇᕐᒪᑕ, ᐅᖅᓱᕈᔪᐃᑦ ᓄᐊᑉᐸᓪᓕᐊᓕᕐᓗᑎᒃ ᐅᓗᕆᐊᓇᕐᑐᒦᔾᔪᑎᒋᓕᒃᑲᓐᓂᕐᓗᒍ ᐆᒻᒪᑎᕐᓗᒍᑎᓄᑦ.

ᖃᐅᔨᒪᓐᓂᖅᐱᑦ ᓯᒡᒐᓕᐊᒧᑦ ᓄᖅᑲᕌᖓᕕᑦ:

• ᐃᑲᕐᕋᑦ 48 ᐃᓗᐊᓂ, ᐆᒻᒪᓯᒐᔭᕐᓂᕐᓄᑦ ᐅᓗᕆᐊᓇᕈᑎᖏᑦ ᓄᖑᑉᐹᓪᓕᕇᖅᐸᒃᑐᑦ.
• ᐊᕐᕌᒍᑉ ᐃᓗᐊᓂ, ᐆᒻᒪᑎᖕᓄᑦ ᐊᑲᐅᖏᓕᐅᕈᑎᐅᔪᓐᓇᕐᑐᑦ ᐊᕝᕙᓗᐊᖓᑕ ᐱᖏᓐᓂᖅᓴᐅᓕᕐᐸᒃᑐᑦ ᓯᒡᒐᓕᐊᖅᑐᓲᑉ ᓴᓂᐊᓂ.
• ᐊᕐᕌᒍᑦ 5-ᒥᑦ 15-ᒧᑦ ᓯᒡᒐᓕᐊᕐᑐᕈᓐᓃᕈᕕᑦ ᐆᒻᒪᓯᒐᔭᕐᓂᕐᒧᑦ ᐅᓗᕆᐊᓇᕐᑐᒦᓐᓃᑦ ᐊᔾᔨᖃᓕᕋᔭᕐᑐᖅ ᓱᒡᒐᓕᐊᖅᑐᓚᐅᕐᓯᒪᖏᑦᑐᑐᑦ.

ᓯᒡᒐᓕᐊᖅᑐᐃᓐᓇᖃᑦᑕᕋᓗᐊᕈᕕᑦ, ᐊᒫᒪᒃᑎᑦᑎᓂᖅ ᓱᓕ ᐱᐅᓂᖅᐹᖑᕗᖅ ᕿᑐᕐᖓᕐᓄᑦ. ᑎᒥᐅᑉ ᐅᓇᑕᐅᑎᖏᑦ ᓄᒃᑭᖕᓇᕈᑎᖏᓪᓗ ᐊᑲᐅᓈᕈᑎᒋᖕᒪᒋᑦ ᐱᐊᕋᐅᑉ ᐱᔭᕆᐊᖃᓪᓚᕆᒃᑕᖏᓐᓄᑦ ᐅᓗᕆᐊᓇᕈᑎᖏᑦ ᐱᖏᖕᓇᖏᓐᓂᖅᓴᐅᓪᓗᑎᒃ.

ᐊᓈᓇᐅᔪᖅ ᕿᑐᕐᖓᓛᒥᓂ ᐅᓗᕆᐊᓇᖏᑦᑐᒦᑎᑦᑎᓂᖅᓴᐅᔪᓐᓇᕐᑐᖅ ᐃᒫᒃ:

• ᓄᖅᑲᕐᓗᓂ ᓯᒡᒐᓕᐊᒧᑦ ᐊᒻᒪᓘᓐᓃᑦ ᓯᒡᒐᓕᐊᖅᑐᓗᐊᖏᓐᓂᖅᓴᐅᖃᑦᑕᓕᕈᓂ
• ᓯᓚᒥ ᑭᓯᐊᓂ ᓯᒡᒐᓕᐊᖅᑐᖃᑦᑕᕈᓂ
• ᕿᑐᕐᖓᓛᖓᑕ ᓴᓂᐊᓂ ᓯᒡᒐᓕᐊᖅᑐᖃᑦᑕᖏᓪᓗᓂ, ᐊᒫᖅᑎᓪᓗᒍᓗ
• ᐊᒫᒪᒃᑎᑦᑎᔭᕇᕌᖓᑦ ᓯᒡᒐᓕᐊᖅᑐᖃᑦᑕᕈᓂ (ᐊᒫᒪᒃᑎᑦᑎᓚᐅᖏᓐᓂᕐᒥᓂᐅᖏᑦᑐᖅ)

ᓯᒡᒐᓕᐊᖅᑐᖃᑦᑕᕐᓗᓂ ᑕᖃᑎᑦ ᖂᑭᓐᓂᖅᓴᐅᓕᓲᖑᖕᒪᑕ ᐊᓂᖅᑎᕆᓂᕆᔭᐃᓪᓗ ᐃᖏᕐᕋᑦᑎᐊᖏᓐᓂᖅᓴᐅᓕᕐᑐᓂ ᑎᒥᕕᑦ ᑭᓱᕈᓘᔭᖏᓐᓄᑦ ᐊᒡᓛᑦ ᐅᕕᓂᖕᓄᑦ. ᐅᕕᓃᑦ ᐊᓂᖅᑎᕆᑦᑎᐊᖃᑕᐅᖏᑐᐊᕋᒥ ᐃᒧᓪᓗᕿᖑᔭᒻᒪᑦ. ᓯᒡᒐᓕᐊᕐᒥ ᓂᐅᖅᓯᑕᒫᑦ ᑮᓇᐃᑦ ᓯᒡᒐᓕᐊᑦ ᐃᒪᕐᓗᑯᕕᓂᖏᓐᓂ ᐅᐊᓴᖅᑐᑎᑐᑦ ᐱᕙᒃᑕᐃᑦ ᐅᕕᓂᒃᐱᑦ ᑕᓯᑦᑕᑦᑎᐊᕈᓐᓇᐅᑎᖓ ᐱᐅᓗᖁᑎᖓᓗ ᐱᐅᔪᓐᓃᖅᑕᐅᓪᓗᓂ - ᐅᕕᓂᑦᑎᐊᕆᒍᑎᐅᖕᒪᑕ ᑕᐃᒃᑯᐊ.

ᓱᑲᖃᓗᐊᓕᔭᒃᑯᕕᑦ ᓯᒡᒐᓕᐊᕐᑐᖃᑦᑕᕐᓗᑎᓪᓗ, ᐆᒻᒪᓯᓂᕐᒧᑦ ᐃᓅᔪᓐᓃᕈᓐᓇᕐᓃᑦ ᐱᖓᓱᐃᖅᓲᑎᓪᓗᐊᒥ ᐊᑐᔭᓐᓂᖅᓴᐅᔪᓐᓇᕐᐳᖅ ᑎᒥᒥᒍᑦ ᓱᑲᖃᓗᐊᕐᑐᑦ ᓯᒡᒐᓕᐊᕐᑐᓲᖑᖏᑦᑐᑦ ᓴᓂᐊᓂ.

ᐆᒻᒪᕆᑦᑎᐊᕐᓂᖅᓴᐅᒋᑦ. ᑎᒥᒃᑯᑦ ᓱᑲᖃᓗᐊᕈᕕᑦ ᓯᒡᒐᓕᐊᕐᑐᖃᑦᑕᕐᓗᑎᓪᓗ, ᓄᖅᑲᕈᕕᑦ ᐱᐅᓂᕐᓴᖅ ᑕᒪᒃᑯᓄᖓ ᑎᑭᐅᑎᖁᓇᒃ.

ᕿᑐᕐᖓᒃᓴᖃᕐᓗᓂ ᓯᒡᒐᓕᐊᕐᑐᖃᑦᑕᕐᓂᖅ ᐊᔾᔨᒌᖏᑦᑐᓂ ᐱᕐᔪᐊᖑᔪᓂ ᖃᓄᐃᑦᑐᓐᓇᕈᓐᓇᕐᒪᑦ ᓇᔾᔨᐊᕐᓄᑦ. ᐊᕐᓇᐃᑦ ᓯᒡᒐᓕᐊᕐᑐᑲᐅᓂᖅᓴᐅᔪᑦ ᐱᕐᓗᒃᓴᕋᐃᑦᑐᓐᓇᕐᓂᖅᓴᑦ ᐊᒻᒪ ᐊᓂᕐᓂᖃᖏᑦᑐᒥ ᐃᕐᓂᔭᓐᓂᖅᓴᐅᓪᓗᑎᒃ. ᓯᒡᒐᓕᐊᕐᑐᖃᑦᑕᖅᑐᑦᑕᐅᖅ ᐅᕿᓐᓂᖅᓴᓂ ᐃᕐᓂᒐᔪᖕᓂᖅᓴᐅᔪᑦ (ᒥᑭᓐᓂᖅᓴᐅᓪᓗᑎᒃᓗ) ᐊᒻᒪᓘᓐᓃᑦ ᐱᓇᐃᓗᑕᓕᖕᓂ.

ᐊᓯᖏᑦ ᓴᖅᑭᒍᓐᓇᕐᑐᑦ ᓇᔾᔨᓗᓂ ᓯᒡᒐᓕᐊᕐᑐᖃᑦᑕᕐᓂᕐᒧᑦ ᐃᒪᐃᑦᑑᕗᑦ:

• ᐊᓂᕐᓇᖓᑲᓪᓚᖕᓂᖅ (ᑐᖁᑐᐃᓐᓇᕐᓂᖅ) (ᐱᐊᕋᕐᑎᒍᑐᐊᖅ ᐊᑐᓲᖅ)
• ᐃᓅᔪᓐᓇᕐᑐᖅ ᐱᐊᕋᖅ ᐳᕙᖏᑦ ᓴᙲᓐᓂᕐᓴᐅᓗᑎᒃ ᑎᒥᖓᑕ ᐅᓇᑕᐅᑎᖏᑦ ᓴᙲᓐᓂᖅᓴᐅᓗᑎᒃ
• ᓯᐅᓯᕆᒐᔪᖕᓂᖅᓴᐅᓗᓂ
• ᐋᓐᓂᐊᖃᓕᕈᓐᓇᕐᓂᖅᓴᐅᔪᑦ ᐃᓐᓇᐅᓕᕈᑎᒃ ᓲᕐᓗ ᓂᕆᔭᖏᓐᓄᑦ ᓱᑲᖃᓗᐊᔭᓐᓂᕐᒥ, ᐆᒻᒪᓯᓂᖅ ᐊᒻᒪᓗ ᑎᒡᓕᖕᓂᖓ ᓯᖒᓗᐊᖃᑦᑕᕐᓗᓂ.

ᐅᑯᐊᖑᓪᓗᑎᒃ:

• ᐆᒻᒪᓯᔪᓐᓇᕐᓂᖓ ᐊᖏᓂᖅᓴᐅᓕᕐᓗᓂ ᓯᒡᒐᓕᐊᕐᑐᖃᑦᑕᕈᓂ ᐊᒻᒪᓗ ᓇᔾᔨᓇᖏᑦᑐᓂ ᐄᖅᑲᖃᑦᑕᕈᓂ (ᐃᓐᓇᕈᖅᐸᓪᓕᐊᓗᓂ ᓇᖏᐊᕐᓇᕐᓂᖅᓴᕈᓲᖅ)
• ᓇᔾᔨᔪᓐᓇᐃᓕᓂᖅ
• ᐊᐅᓈᕆᐊᖃᕐᓗᓂ ᐊᓪᓗᐃᓂᖅ
• ᐊᐅᓈᓕᖔᖓᑦ ᐊᑯᐊᖑᒐᔪᖕᓂᖅᓴᓪᓚᕆᐅᓗᓂ
• ᐋᓐᓂᐊᖅᑖᓚᕿᓂᖅᓴᐅᔪᓐᓇᕐᑐᖅ ᐃᒡᓕᐊᖓᒍᑦ ᖂᖃᖓᒍᓪᓗ
• ᓴᐅᓂᖏᑦ ᐊᕿᓗᑎᒃ ᐃᓐᓇᐅᓂᖅᓴᓂ ᐊᕐᓇ ᐊᒻᒪᓗ ᓯᕝᕕᐊᖓᒍᑦ ᓴᐅᓂᖓ ᓇᕕᒃᓗᓂ ᓄᑭᔭᓐᓂᖅᓴᐅᓗᑎᒃᓘᓐᓃᑦ
• ᐊᐅᓈᖃᑦᑕᕈᓐᓃᕐᓴᕋᐃᓐᓂᖅᓴᐅᓗᓂ

ᓴᐅᓂᕗᑦ ᑎᓯᓗᐊᕈᓐᓃᕐᐸᑦ ᓯᕝᕕᐊᕐᓗᓕᕈᑎᒋᔪᓐᓇᕋᑦᑎᒍᑦ ᓯᕝᕕᐊᖏᓪᓕᓗᑕᓘᓐᓃᑦ. ᐊᕐᓇᐃᑦ ᓴᐅᓂᖏᑦ ᐊᕿᓕᓴᕋᐃᓐᓂᕐᓴᐅᖕᒪᑕ ᓯᒡᒐᓕᐊᕐᑐᖃᑦᑕᖅᑎᓪᓗᒋᑦ ᐅᓗᕆᐊᓇᖅᑐᒦᔾᔪᑎᒋᓪᓗᒍ.

ᐃᒪᓕᕈᔪᖕᓂᖔᕐᑐᑦ ᓯᒡᒐᓕᐊᑉ ᐃᓗᐊᓂ ᑎᒥᕕᑦ ᓴᓇᒪᓂᕆᔭᖏᓐᓂ ᑕᖃᕕᓪᓗ ᐊᕙᑎᖏᓐᓂ ᓂᐱᓐᓈᓕᕐᑎᑦᑎᓲᖑᖕᒪᑕ, ᐅᓗᕆᐊᓇᕐᑐᑦ ᐅᖅᓱᕈᔪᐃᑦ ᓴᓂᕌᒍᑦ ᐊᔪᖅᓯᑦᑐᓐᓇᖅᓯᓪᓗᑎᒃ. ᐊᐅᒃᐱᑦ ᑕᖃᖏᑦ ᓯᒥᒃᓯᒪᓕᕌᖓᑕ ᐊᓂᖅᑎᕆᓂᕐᓄᑦ ᓂᐅᕈᑎᒋᔭᑎᑦ ᖃᕋᓴᕐᓅᖃᑎᐊᕈᓐᓃᕐᐸᑕ ᐆᒻᒪᓯᔪᓐᓇᕐᑐᑎᑦ.

ᖃᐅᔨᒪᓐᓂᖏᓚᑎᑦ?

ᓱᕐᓗᒃᑯᑦ ᓯᒥᒃᑎᓯᒪᖃᑦᑕᕈᕕᑦ ᐊᑲᐅᖃᑦᑕᖏᑉᐸᓘᓐᓃᑦ, ᓲᕐᓗ ᑲᒃᑭᓖᓐᓇᔭᓗᑎᑦ, ᓯᒡᒐᓕᐊᖅᑐᕐᓃᑦ ᐱᒋᐊᓪᓚᒍᑕᐅᔪᓐᓇᕐᑐᖅ.

50 ᐅᖓᑖᓂᒻᒪᑕ ᐃᒥᕈᔪᓖᑦ ᓯᒡᒐᓕᐊᒥ ᐋᓐᓂᐊᕐᑖᕈᑕᐅᓲᑦ ᑳᓐᓱᒥ. ᓯᒡᒐᓕᐊᑉ ᐳᔪᖓᓂ ᓂᐅᕋᕕᑦ, ᑖᒃᑯᐊ ᐃᒥᕈᔪᓕᖕᓂᖔᕐᑐᑦ ᐳᕙᖕᓂ ᓱᒃᑯᐃᕙᖕᒪᑕ. ᐳᕝᕕᕆᓕᕈᑕᐅᔪᓐᓇᕐᑐᑦ ᐊᔾᔨᒌᖏᒪᑕ, ᓲᕐᓗ ᖁᐃᖅᓱᐃᓐᓇᔭᓐᓂᖅ, ᐳᕙᒃᑯᑦ ᐃᒻᒪᒃᓯᒪᓂᖅ, ᐋᓐᓂᐊᖃᓕᕐᓂᖅ ᐊᒻᒪᓗ ᐊᓂᕐᓂᑭᔭᖃᑦᑕᕐᓂᖅ, ᐃᐱᓂᐊᖃᑦᑕᓂᕐᓘᓐᓃᑦ.

ᖃᐅᔨᒪᓐᓂᕐᐱᑦ?

• ᐳᕙᑯᑦ ᐋᓐᓂᐊᖃᓕᕐᓂᖅ ᑳᓐᓱᒥ ᓯᒡᒐᓕᐊᕐᑐᖃᑦᑕᓂᕐᒧᑦ ᐳᔪᖓᓂᓘᓐᓃᑦ ᐊᓂᖅᓵᖃᑦᑕᓂᕐᒥᖔᒐᔪᖕᒪᑦ ᑕᒪᓐᓇ ᑕᐃᒪᐃᖏᑦᑐᓐᓇᕋᓗᐊᕐᒪᑦ.
• ᐃᓄᐃᑦ ᐊᖑᑏᑦ ᐊᕐᓇᐃᓪᓗ ᑲᓇᑕᒥ ᓄᓇᕐᔪᐊᓕᒫᒥ ᐳᕙᒃᑯᑦ ᐋᓐᓂᐊᖃᒐᔪᖕᓂᖅᐸᐅᖕᒪᑕ.
• ᐳᕙᒃᑯᑦ ᐋᓐᓂᐊᖃᓕᓲᑦ ᐊᒃᐸᒃᐹᓪᓕᑐᐊᖅᐸᑕ ᓄᓇᕗᒥᐅᑦ ᐃᓅᓯᑲᑯᑖᖕᓂᖅᓴᐅᖃᑦᑕᓕᕋᔭᕐᑐᑦ.

4000 ᐅᖓᑖᓃᒻᒪᑕ ᐃᒥᕐᓗᐃᑦ ᓯᒡᒐᓕᐊᑉ ᐃᓗᐊᓂ ᑎᒥᖕᓂ ᐊᐅᖕᓅᖃᕈᓐᓇᕐᑐᑦ ᓱᐴᕐᑐᓕᕌᖓᕕᑦ. ᐃᓚᒋᔭᐅᕗᖅ ᐊᓂᕐᓂᑦᑕ ᐊᓂᑎᓲᖓ ᑳᐸᓐ ᒪᓈᒃᓴᐃᑦ, ᑐᖁᔾᔪᑕᐅᔪᓐᓇᕐᑐᖅ

ᓯᒡᒐᓕᐊᖅᑐᕐᓂᖅᑕᐅᖅ ᐆᒻᒪᑎᕕᑦ ᑎᒡᓕᖕᓂᖓᓂ ᓯᖒᕐᑎᑦᑎᓂᖅᓴᐅᕙᖕᒪᑦ ᐊᒡᒐᖕᓄᑦ ᐃᓯᒐᖕᓄᓪᓗ ᑎᑭᑕᐅᑦᑎᐊᕈᓐᓇᐃᓪᓕᓗᑎᒃ.

ᓯᒡᒐᓕᐊᑉ ᐳᔪᖓ ᐃᓗᓕᖃᕐᒪᑦ ᐊᓂᕐᓂᑦᑕ ᐊᓂᑎᓲᖓ ᑳᐸᓐ ᒪᓈᒃᓴᐃᑦᒥ, ᐃᓯᐊᕿᕐᓘᓪᓗᓂ ᑎᒥᖕᓂ ᒥᓂᑦᑎᓲᖅ ᐊᓂᕐᓵᖅᑐᕌᖓᑦᑕ ᓂᐅᑦᑎᐊᕈᓐᓇᐅᑎᑦᑎᓐᓂ. ᑕᐃᒪᓐᓇ ᑕᖃᓯᒪᓂᖅᓴᐅᓲᖑᕗᑦ ᓴᖕᓂᓲᖑᓪᓗᑎᒃᓗ ᓂᒪᔭᖅᑐᕕᓕᐅᔭᕌᖓᕕᑦ.

ᖃᐅᔨᒪᓐᓂᕐᐱᑦ?

ᓯᒡᒐᓕᐊᕐᑐᖃᑦᑕᕐᓂᖅᑕᐅᖅ ᐆᒻᒪᑎᕕᑦ ᑎᒡᓕᕐᓂᖓ ᐊᒡᒐᖕᓄᑦ ᑎᑭᑦᑎᐊᖏᔾᔪᑎᒋᔪᓐᓇᕆᕙᐅᒃ.

ᐃᖅᑲᐅᒪᒋᑦ ᓯᒡᒐᓕᐊᖅᑐᖏᑕᓕᒫᑎᑦ ᐃᑲᔫᑎᖕᒪᑦ ᑎᒥᖕᓄᑦ.

ᐃᓚᖏᑦ ᐋᓐᓂᐊᓪᓚᕆᒃᑐᐊᓘᕙᒃᑐᑦ, ᐱᓗᐊᕐᑐᒥ ᐃᖃᐃᓕᓴᓕᕋᒥᒃ.

ᐱᓗᐊᕐᓂᖅᓴᐅᔪᓐᓇᕐᑐᑦ, ᓂᐅᖕᓄᑦ ᐊᐅᑦ ᐃᖏᕐᕋᑎᐊᓗᐊᖏᑉᐸᑦ ᑐᖁᓕᔪᓐᓇᕐᒪᑕ. ᑐᖁᓕᓂᕋᖅᑕᐅᕗᖅ ᑎᒥᖕᓂ ᑐᖁᓕᕙᓪᓕᐊᔪᖃᓕᕌᖓᑦ ᐊᐅᖓ ᑕᐃᑯᖓ ᐃᖏᕐᕋᑦᑎᐊᖏᓐᓂᖃᓕᕌᖓᑦ.

ᓲᕐᓗᑕᐅᖅ ᓯᒡᒐᓕᐊᕐᑐᕐᓂᖅ ᐊᒡᒐᖕᓄᑦ ᐃᓯᒐᖕᓄᓪᓗ ᐊᐅᑉ ᐃᖏᕐᕋᑎᐊᖏᑦᑐᓐᓇᕐᒪᑦ, ᑕᐃᒪᐃᒻᒥᔪᖅᑕᐅᖅ ᐅᓱᖕᒧᑦ ᓯᖒᕐᓂᖓ ᑎᑭᑦᑎᐊᖏᑦᑐᓐᓇᕐᒥᔪᖅ, ᐊᖑᑎᑦ ᓇᐸᓚᑦᑎᔪᓐᓇᐅᑎᒋᓲᕆᖕᒪᐅᒃ ᐊᐅᑉ ᐃᖏᕐᕋᓂᖓ.

ᓄᖅᑲᖅᑕᕋᐃᒋᑦ.

ᐊᖑᑎ ᓄᖅᑲᖅᓴᕋᐃᓐᓂᖅᓴᐅᒃᐸᑦ, ᑕᐃᒪᓐᓇ ᐊᑲᐅᖏᓕᐅᕈᑎᖃᖏᑉᐹᓕᕈᓐᓇᕐᑐᖅ ᐊᒻᒪᓘᓐᓃᑦ ᑕᐃᒪᐃᖃᑦᑕᕈᓐᓃᕐᓗᓂ.