ᑎᐹᒃ ᒪᓕᒐᕐᓗ

ᑎᐹᖕᒧᑦ ᐊᒻᒪ ᓱᐴᖅᑐᕐᓂᕐᒧᑦ ᐱᖁᔭᖅ | ᑭᒡᓕᒋᔭᐅᔪᑦ ᐊᒻᒪ ᓱᐴᖅᑐᕐᕕᐅᒋᐊᖃᙱᑦᑐᑦ | ᒪᓕᒐᐃᑦ ᓂᐅᕕᕐᕕᒋᔭᐅᕙᒃᑐᓄᑦ | ᐊᑐᓕᖅᑎᑦᑎᓂᖅ

ᑎᐹᖕᒧᑦ ᓱᐴᖅᑐᕐᓂᕐᒧᓪᓗ ᐱᖁᔭᖅ

ᒪᐃ 31, 2023−ᒥ, ᓄᓇᕗᒻᒥ ᑎᐹᖕᒧᑦ ᓱᐴᖅᑐᕐᓂᕐᒧᓪᓗ ᐱᖁᔭᖅ (TSA) ᐊᑐᓕᓚᐅᖅᑐᖅ ᓴᙱᒃᑎᒋᐊᕐᓗᒍ ᐃᓇᖏᕐᓗᒍᓗ ᑎᐹᖕᒧᑦ ᐊᐅᓚᑦᑎᓂᕐᒧᑦ ᐊᒻᒪ ᓱᐴᖅᑐᕐᕕᐅᒋᐊᖃᙱᑦᑐᓄᑦ ᐱᖁᔭᖅ 15-ᓄᑦ ᐅᑭᐅᓄᑦ ᐱᖁᔭᕆᔭᐅᑎᒋᓕᖅᑐᖅ.

ᐅᑯᓇᓂ ᑎᐹᖕᒧᑦ ᐊᒻᒪ ᓱᐴᖅᑐᕐᓂᕐᒧᑦ ᐱᖁᔭᖅ (TSA) ᐋᖅᑭᒃᑕᐅᓚᐅᖅᑐᖅ ᓴᐳᔾᔭᐅᓗᑎᒃ ᓄᓇᕗᒻᒥᐅᑦ ᐱᐅᙱᑦᑐᒥᒃ ᓱᐴᖅᑐᖅᑕᐅᔫᑉ ᐳᔪᖓᓂᒃ, ᐱᓗᐊᖅᑐᒥᒃ ᓄᑕᖅᑲᑦ, ᕿᑐᕐᖓᒃᓴᖃᖅᑐᑦ ᐊᕐᓇᐃᑦ ᐃᓄᐃᓪᓗ ᐋᓐᓂᐊᖃᖅᑐᑦ, ᖃᐅᔨᒪᒋᐊᕐᓗᒋᑦ ᑭᒃᑯᑐᐃᓐᓇᕐᓄᑦ ᐅᐸᒃᑕᐅᕝᕕᑦ ᓱᐴᖅᑐᕐᕕᐅᔭᕆᐊᖃᙱᓐᓂᖏᓐᓂᑦ.

ᑎᐹᖕᒧᑦ ᓱᐴᖅᑐᕐᓂᕐᒧᓪᓗ ᐱᖁᔭᖅ (TSA) ᑐᓴᕐᕕᒋᔪᓐᓇᖅᐸᕗᑦ ᓇᓂ ᑎᐹᑦ, ᓯᒑᓕᐊᙳᐊᑦ ᐊᓯᖏᓪᓗ ᓯᒡᒐᓕᐊᙳᐊᑦ, ᓱᕐᕋᖕᓇᖅᑐᓪᓗ ᐊᑐᖅᑕᐅᔪᓐᓇᕐᓂᖏᓐᓂᑦ, ᑕᐃᒃᑯᓄᖓ ᓂᐅᕕᕈᓐᓇᖅᑐᓄᑦ ᑭᒡᓕᖃᖅᑎᑦᑎᕙᒃᖢᑎᒃ ᓂᐅᕐᕈᑎᖃᖅᐸᒃᑐᑦ.

 

 

ᐱᒻᒪᕆᐅᔪᑦ ᐊᓯᔾᔨᖅᑐᑦ ᒪᓕᒐᓕᐊᖑᔪᒪᔪᒧᑦ:

1. ᓱᐴᖅᑐᕐᕕᐅᒋᐊᖃᙱᑦᑐᑦ ᐃᒡᓗᐃᑦ
   ᒫᓐᓇ ᐱᖁᔭᕐᒥᒃ ᓱᕋᐃᓂᐅᕗᖅ ᓱᐴᖅᑐᕐᓂᐊᕐᓗᓂ, ᓯᒡᒐᓕᐊᙳᐊᓂᒃ ᐊᑐᕐᓂᐊᕐᓗᓂᓘᓐᓃᑦ ᓱᕐᕋᖕᓇᖅᑐᓂᒃ ᑕᒪᐃᓐᓂ ᑭᒃᑯᑐᐃᓐᓇᓄᑦ ᑮᓇᐅᔭᖃᖅᑎᑕᐅᔪᓂ ᐊᖏᕐᕋᕆᔭᐅᕙᒃᑐᓂ ᓄᓇᕗᑦ ᒐᕙᒪᖓᑕᓗ ᐃᖅᑲᓇᐃᔭᖅᑎᖏᑕ ᐊᖏᕐᕋᕆᔭᖏᓐᓂ. ᑕᒪᓐᓇ ᐃᓚᖃᕆᕗᖅᑕᐅᖅ ᐅᐸᒃᑕᐅᒐᔪᒃᑐᓂᒃ ᐃᒡᓗᕐᔪᐊᒥ, ᓲᕐᓗ ᐊᓃᕐᕖᑦ, ᓱᓪᓗᑯᑖᑦ, ᒪᔪᕋᐅᑎᑦ, ᐃᓯᕐᕖᓪᓗ. ᑖᒃᑯᐊ ᐃᑲᔪᕐᓂᐊᖅᑐᑦ ᒥᒃᖠᒋᐊᖅᑎᓪᓗᒍ ᓄᓇᕗᒻᒥᐅᑦ ᓴᖅᑭᔮᕐᕕᐅᓂᖏᑦ ᐊᑦᑕᕐᓇᖅᑐᒥᒃ ᓱᐴᖅᑐᖅᑐᓃᓪᓗᓂ ᐳᔪᕐᒥᒃ ᓴᐳᑎᓗᒋᓪᓗ ᐋᓐᓂᐊᖃᖅᑕᐃᓕᒪᓂᖅ ᖃᓄᐃᙱᑦᑎᐊᕐᓂᕐᓗ ᓴᓂᓕᖅᖠᑦᑎᐊᖏᓐᓂ.
   
2. ᓱᐴᖅᑐᕐᕕᐅᒋᐊᖃᙱᑦᑐᑦ ᓄᓇᓯᐅᑏᑦ
   ᓱᐴᖅᑐᕐᓂᖅ, ᐳᔫᖅᑎᑦᑎᓂᖅ, ᐅᕝᕙᓘᓐᓃᑦ ᓱᕐᕋᖕᓇᖅᑐᖅᑐᖃᑦᑕᕐᓂᖅ ᐃᖏᕐᕋᔾᔪᑎᒃᑯᑦ ᐊᐅᓚᐅᑎᖃᖅᑐᒦᓪᓗᑎᒃ, ᓲᕐᓗ ᓄᓇᓯᐅᑎᒥᑦ, ᐅᒥᐊᕐᒥᑦ, ᑎᓴᒪᓕᖕᒥᑦ, ᐅᕝᕙᓘᓐᓃᑦ ᓯᑭᑑᕐᒥᑦ 19 ᑐᖔᓂ ᐅᑭᐅᓕᖕᒥᑦ ᐃᑭᒪᔪᖃᖅᑎᓪᓗᒍ ᒪᓕᒐᕐᒥᒃ ᓱᕋᐃᓂᐅᕗᖅ.
   ᑖᒃᑯᐊ ᒪᓕᒐᐃᑦ ᑐᕌᖓᑎᑕᐅᕗᑦ ᒥᒃᖠᒋᐊᕈᑕᐅᓇᓱᒃᖢᑎᒃ ᓱᐴᖅᑐᖅᑕᐅᔫᑉ ᐳᔪᖓᓂ ᓴᐳᔾᔨᔾᔪᑕᐅᓇᓱᒃᖢᑎᒡᓗ ᐅᑭᐅᑭᓗᐊᖅᑐᓄᑦ.
   

ᑭᒡᓕᖏᑦ ᐊᒻᒪ ᓱᐴᖅᑐᕐᕕᐅᒋᐊᖃᙱᑦᑐᑦ

ᒪᓕᒐᕐᒥᑦ ᓱᕋᐃᓂᐅᕗᖅ ᓱᐴᖅᑐᕐᓂᐊᕐᓗᓂ, ᓯᒡᒐᓕᐊᙳᐊᓂᒃ ᐳᔫᖅᑎᒐᕐᓂᑦ ᐊᑐᕐᓂᐊᕐᓗᓂᓘᓐᓃᑦ ᓱᕐᕋᖕᓇᖅᑐᓂᒃ ᐅᑯᓇᓂ ᓱᐴᖅᑐᕐᕕᐅᔭᕆᐊᖃᙱᑦᑐᓂᒃ ᐱᓕᕆᕝᕕᖕᓂᑦ ᐊᒻᒪᓘᓐᓃᑦ ᑭᓪᓕᒋᑎᑕᐅᔪᓂᑦ. ᑭᒡᓕᒋᑎᑕᐅᔪᖅ 9 ᒦᑕᑦ ᐹᒥᑦ ᐊᓂᕝᕕᖕᒥᓪᓘᓐᓃᑦ ᐃᒡᓗᕐᔪᐊᒧᑦ ᐅᖓᓯᒃᑎᒋᔪᖅ. ᑖᓐᓇ ᐱᖃᓯᐅᔾᔨᔪᖅ ᐊᔭᐅᕈᑎᓕᖕᓄᑦ ᓯᕕᖓᓃᑦ, ᐱᓱᒡᕖᑦ ᐃᒡᓗᕐᔪᐊᕐᒥᑦ, ᒪᔪᕋᕐᕖᑦ, ᐃᒐᓛᑦ, ᐊᒻᒪ ᐊᓂᐊᕝᕖᑦ.

ᓱᐴᖅᑐᕐᕕᐅᒋᐊᖃᙱᑦᑐᑦ ᐅᑯᐊ:

• ᐃᖅᑲᓇᐃᔭᕐᕖᑦ ᐊᒻᒪ ᐃᖅᑲᓇᐃᔭᖅᑏᑦ ᓄᓇᓯᐅᑎᖏᑦ;
• ᐃᓄᖕᓄᑦ ᐊᑐᖅᑕᐅᕙᒃᑐᑦ ᐃᓄᖕᓄᓪᓗ ᐃᒡᓗᕐᔪᐊᕆᔭᐅᔪᑦ;
• ᐃᓕᓐᓂᐊᕐᕖᑦ ᐊᒻᒪᓗ ᐃᓕᓐᓂᐊᕐᕖᑦ ᓯᓚᑎᖏᑦ;
• ᐋᓐᓂᐊᕕᐊᓗᐃᑦ, ᐋᓐᓂᐊᕖᑦ ᐊᒻᒪ ᓯᓚᑎᖏᑦ;
• ᐸᐃᕆᕖᑦ ᐊᒻᒪ ᓯᓚᑎᖏᑦ;
• ᐅᐸᒃᑕᐅᒐᔪᒃᑐᑦ ᑲᑎᙵᔪᑦ ᐃᒡᓗᐃᑦ ᐅᕝᕙᓘᓐᓃᑦ ᐃᒡᓗᐃᑦ ᑲᑎᙵᔪᑦ;
• ᓯᓚᒥ ᓂᕆᔭᖅᑐᕐᕖᑦ ᓯᓚᑎᖏᑦ ᐅᕝᕙᓘᓐᓃᑦ ᐃᒥᕐᕖᑦ ᖃᓂᒋᔮᓂ;
• ᑭᒡᓕᓕᐅᕐᓂᖅ ᐃᒐᓛᒥᑦ ᐊᑐᖅᑕᐅᔪᒥᑦ ᐊᑐᐃᓐᓇᐅᑎᑦᑎᓂᕐᒧᑦ ᐱᖁᑎᓂᒃ ᐅᕝᕙᓘᓐᓃᑦ ᐱᔨᑦᑎᕋᕐᓂᕐᒥᑦ ᐃᓄᖕᓄᑦ;
• ᐃᖏᕐᕋᔾᔪᑎᒃᑰᕐᓂᖅ ᐅᑭᐅᑭᑦᑐᒥᒃ ᐃᑭᒪᔪᖃᖅᑎᓪᓗᒍ;
• ᐃᓕᓐᓂᐊᕐᕖᑦ ᓯᓚᑎᖏᓐᓂᑦ ᐱᙳᐊᕐᕖᑦ, ᐅᕝᕙᓘᓐᓃᑦ ᓯᓚᒥ ᐱᙳᐊᕐᕖᑦ;
• ᖁᙱᐊᕆᐊᖅᑐᕐᕖᑦ, ᖁᙱᐊᕐᕖᑦ, ᐊᒻᒪ ᐃᓄᒋᐊᓂᒃ ᐱᓕᕆᕝᕖᑦ;
• ᑭᒡᓕᒋᑎᑕᐅᔪᖅ ᐃᒡᓗᖃᕐᕕᐅᔪᒥᑦ.

ᒪᓕᒐᐃᑦ ᓂᐅᕕᕐᕕᖕᓄᑦ ᐊᒻᒪ ᑭᒃᑯᓕᒫᓄᑦ

ᐅᕘᓇ ᑎᐹᖕᒧᑦ ᐊᒻᒪ ᓱᐴᖅᑐᕐᓂᕐᒧᑦ ᐱᖁᔭᖅ, ᒪᓕᒐᕐᒥᒃ ᓱᕋᐃᓂᐅᕗᖅ ᐃᒪᓐᓇ:

• ᓂᐅᕕᐊᒃᓴᖃᕐᓂᖅ ᑎᐹᖕᓂᑦ ᐊᑐᖅᑕᐅᖔᕈᓐᓇᖅᑐᓂᓪᓗ ᓂᐅᕕᐊᒃᓴᑦ ᑭᒃᑯᑐᐃᓐᓇᕐᓄᑦ 19 ᑐᖔᓂ ᐅᑭᐅᓕᖕᓄᑦ.
• ᐊᑐᐃᓐᓇᐅᑎᑦᑎᓂᖅ (ᑐᓂᓯᓂᖅ/ᑕᐅᖅᓰᓂᖅ) ᑎᐹᖕᒥᑦ, ᓯᒡᒐᓕᐊᙳᐊᓂᑦ ᐊᓯᖏᓐᓂᒡᓗ ᓯᒡᒐᓕᐊᙳᐊᓂᑦ, ᓱᕐᕋᖕᓇᖅᑐᓂᓪᓗ ᑭᒃᑯᑐᐃᓐᓇᓄᑦ 19 ᑐᖔᓂ ᐅᑭᐅᓕᖕᓄᑦ.
• ᐊᑕᐅᓯᐅᓈᖅᑕᕐᓗᒋᑦ ᓯᒡᒐᓕᐊᑦ ᓂᐅᕕᐊᒃᓴᕆᓗᒋᑦ.
• ᓂᐅᕕᐊᒃᓴᖃᕐᓂᖅ ᑎᐹᖕᓂᑦ ᓂᐅᕕᕐᕕᖕᓄᑦ ᐋᑦᑎᕕᐅᖏᓐᓇᖅᐸᙱᑎᓪᓗᒋᑦ ᓂᐅᕕᖅᑐᑦ ᓂᐅᕕᖅᑎᓪᓗᒋᑦ ᓂᐅᕕᕐᕕᓪᓚᑦᑖᒥᓪᓗ.
• ᓂᐅᕕᐊᒃᓴᖃᕐᓂᖅ ᐃᑭᐊᖅᑭᕕᒃᑯᑦ; ᐊᖏᕐᕋᒧᑦ ᐋᑦᑎᓂᖅ ᑎᐹᖕᓂᒃ ᐊᑐᖅᑕᐅᖔᕈᓐᓇᖅᑐᓪᓗ ᑎᐹᖕᒦᑦᑐᖅ ᐅᐃᕆᓇᖅᑐᖅ ᐊᑐᖅᑕᐅᖔᕈᓐᓇᖅᑐᓂᑦ.
• ᓂᐅᕕᐊᒃᓴᐃᑦ ᐊᑐᖅᑕᐅᖔᕈᓐᓇᖅᑐᑦ ᑎᐹᖕᒦᑦᑐᖅ ᐅᐃᕆᓇᖅᑐᖃᖅᑐᑦ ᑲᑎᓯᒪᔪᓂᑦ ᐅᖓᑖᓅᕈᑎᔪᓂᑦ 20 ᒥᓕᒍᕌᒻᔅ ᒥᓕᓖᑕᒧᑦ.
• ᓂᐅᕕᐊᒃᓴᖃᕐᓂᖅ ᑎᐹᖕᓂᑦ ᐃᓚᐅᑎᑦᑎᓂᕐᒥᓪᓘᓐᓃᑦ ᑎᐹᖕᓂᑦ ᓂᐅᕕᐊᒃᓴᖃᕐᓂᕐᒥᑦ ᐊᑐᖅᑐᒥᑦ ᓂᐅᕕᐊᒃᓴᖃᖅᑎᒥ ᐊᑎᓕᐅᖅᓯᒪᒍᕕᑦ ᐅᕝᕙᓘᓐᓃᑦ ᑎᐹᖕᓂᑦ ᓂᐅᕕᐊᒃᓴᖃᖅᑏᑦ ᐱᔪᓐᓇᐅᑎᒥᑦ ᑐᓂᔭᐅᔪᒥᑦ ᐊᑖᓂᑦ ᓄᓇᕗᒻᒥ ᑎᐹᖕᒧᑦ ᑖᒃᓯᔭᕈᑎᓄᑦ ᐱᖁᔭᕐᒥᑦ ᑮᓇᐅᔭᓕᕆᔨᒃᑯᓐᓄᑦ.
• ᓂᐅᕕᐊᒃᓴᖃᕐᓗᑎᑦ ᑎᐹᖕᒥᑦ ᑎᐱᑦᑎᐊᕆᒃᓯᓕᖅᓯᒪᔪᒥᒃ, ᐅᕝᕙᓘᓐᓃᑦ ᓂᐅᕕᐊᒃᓴᒥᑦ ᐋᖅᑭᒃᓯᒪᔪᒥᑦ ᒪᓂᓴᐅᑕᐅᔪᒥᒡᓘᓐᓃᑦ ᐊᑐᖅᑕᐅᓂᐊᖅᑐᒥᑦ ᑎᐱᑦᑎᐊᕆᒃᓯᓕᖅᓯᒪᔪᒧᑦ ᑎᐹᖕᒧᑦ ᐊᑐᖅᑕᐅᖔᕈᓐᓇᖅᑐᓪᓗ ᓂᐅᕕᐊᒃᓴᓄᑦ.
• ᓴᖅᑭᔮᖅᑎᑦᑎᓂᕐᒧᑦ ᐅᔾᔨᕆᔭᐅᓕᖅᑎᓪᓗᒍᓗ ᑎᐹᖕᒧᑦ ᐊᒻᒪ ᓱᐴᖅᑐᖅᑕᐅᓲᑦ ᓂᐅᕕᐊᒃᓴᐃᑦ ᓇᓂᑐᐃᓐᓇᑦᑎᐊᖅ ᑎᐹᑦ ᐊᒻᒪ ᓯᒡᒐᓕᐊᑦ ᓂᐅᕕᐊᒃᓴᐅᖃᑦᑕᖅᑐᓂᒃ.
• ᓴᖅᑭᔮᖅᑎᑦᑎᓂᖅ ᓇᓗᓇᐃᒃᑯᑕᕐᓂᑦ ᓇᓗᓇᐃᖅᓯᔪᓂᑦ ᐊᑐᐃᓐᓇᐅᓂᖏᓐᓂᑦ ᐊᑭᖏᓐᓂᓪᓘᓐᓃᑦ ᑎᐹᑦ, ᓱᐴᖅᑐᕆᐊᖃᖅᑐᒥᒡᓘᓐᓃᑦ ᓂᐅᕕᕐᕕᖕᓂᑦ ᐅᑭᐅᑭᓗᐊᖅᑐᓄᑦ ᐱᔪᓐᓇᖅᑐᓄᑦ.

ᐃᓚᒋᔭᐅᓪᓗᓂ ᓄᓇᕗᒻᒥ ᒪᓕᒐᕐᓄᑦ, ᑲᓇᑕᒥ ᑎᐹᖕᓄᑦ ᒪᓕᒐᖅᑕᖃᕐᒪᑦ ᐊᒃᑐᐃᔪᓂᒃ ᑎᐹᖕᓂᒃ ᐊᑐᖅᑎᓂᒃ ᓂᐅᕕᐊᒃᓴᖃᖃᑦᑕᖅᑐᓂᓪᓗ ᓄᓇᕗᒻᒥ. ᐊᑕᐅᓯᖅ ᑕᐃᔭᐅᔪᖅ ᑲᓇᑕᒥ ᑎᐹᖕᒧᑦ ᓯᒡᒐᓕᐊᙳᐊᓄᓪᓗ ᓂᐅᕕᐊᒃᓴᓄᑦ ᐱᖁᔭᖅ.  ᑐᕌᕆᔭᐅᔪᖅ ᑲᓇᑕᒥ ᑎᐹᖕᒧᑦ ᖃᓄᐃᓕᐅᕈᑕᐅᔪᒪᔪᖅ ᐃᑲᔪᖅᑐᐃᔪᒪᓂᐅᕗᖅ ᑲᓇᑕᒥᐅᓂᒃ ᓱᐴᖅᑐᖅᑎᐅᔪᒪᔪᓐᓃᖅᑐᓂᒃ, ᒥᑭᒡᓕᒋᐊᖅᑎᑦᑎᓗᓂ ᖁᐊᖅᓵᕐᓇᖅᑐᓂᒃ ᑎᐹᖕᒦᑦᑐᖅ ᐅᐃᕆᓐᓇᖅᑐᓄᑦ ᐅᐃᕆᓯᒪᓕᕈᑕᐅᕙᖕᓂᖓ, ᓴᐳᔾᔨᓗᑎᒡᓗ ᖃᓄᐃᙱᑦᑎᐊᕈᓐᓇᕐᓂᖏᓐᓂᒃ ᒪᒃᑯᒃᑐᑦ ᑎᐹᖑᙱᑦᑐᓂᓪᓗ ᐊᑐᖅᐸᒃᑐᑦ. ᐱᓕᕆᐊᒃᓴᕆᔭᐅᔪᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐅᔾᔨᖅᓱᖁᔨᔪᑦ ᓇᓗᓇᐃᒃᑯᑕᖏᓐᓂᒃ ᑕᒪᐃᓐᓄᑦ ᓯᒡᒐᓕᐊᓄᑦ, ᓇᓗᓇᐃᖅᓯᒪᓗᑎᒃ ᖃᓄᖅ ᐱᕐᔪᐊᖑᑎᒋᖕᒪᖔᑕ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐅᔾᔨᖅᓱᖁᔨᔾᔪᑎᑦ ᓴᖅᑭᑦᑕᕆᐊᖃᕐᓂᖏᓐᓂᒃ ᑭᓪᓕᖃᖅᑎᑕᐅᓕᕐᓗᑎᒡᓗ ᓴᖅᑭᔮᖅᑎᑕᐅᓂᖏᓐᓄᑦ ᑎᐹᑦ ᓯᒡᒐᓕᐊᙳᐊᓪᓗ ᓂᐅᕕᐊᒃᓴᑦ.

ᓄᓇᕗᒻᒥ ᑎᐹᖕᒧᑦ ᐊᑐᓕᖅᑎᑕᐅᔪᑦ ᒪᓕᑦᑎᐊᕐᓂᕐᒧᓪᓗ ᐱᓕᕆᐊᒃᓴᑦ

ᑎᐹᖕᒧᑦ ᐊᑐᓕᖅᑎᑦᑎᓂᖅ ᒪᓕᖕᓂᕐᒧᓪᓗ ᐱᓕᕆᐊᒃᓴᖅ ᓇᓗᓇᐃᖅᓯᓂᕐᒧᑦ ᑎᐹᖕᓂᑦ ᓂᐅᕕᐊᒃᓴᖃᖅᑎᓕᒫᑦ ᓄᓇᕗᒻᒥ ᒪᓕᖕᓂᖏᓐᓄᑦ ᓄᓇᕗᒻᒥ ᑎᐹᖕᒧᑦ ᓱᐴᖅᑐᕐᓂᕐᒧᓪᓗ ᐱᖁᔭᕐᒥᑦ (TSA) ᒪᓕᒐᖏᓐᓂᓪᓗ.

ᐱᓕᕆᐊᖅ ᒪᕐᕉᖕᓂᑦ ᐱᓕᕆᐊᒃᓴᖅᑕᖃᖅᐳᖅ ᐱᓕᕆᐊᖑᔪᒃᓴᓂᑦ:

ᐃᓕᓐᓂᐊᕐᓂᖅ ᑐᓴᐅᒪᑎᑦᑎᓂᖅ:

ᑎᐹᖕᓂᑦ ᓂᐅᕕᐊᒃᓴᖃᖅᐸᒃᑐᓕᒫᑦ ᐱᓯᒪᒃᖠᖅᑐᑦ ᓂᐅᕕᐊᒃᓴᖃᕈᓐᓇᕐᓂᕐᒧᑦ ᐱᔪᓐᓇᐅᑎᒥᒃ ᐊᑎᓕᐅᖅᑕᐅᓯᒪᓗᓂ ᑮᓇᐅᔭᓕᕆᔨᒃᑯᓐᓂ ᐃᓕᓐᓂᐊᖅᑎᑕᐅᔪᓐᓇᕐᓗᑎᒃ ᐱᓕᕆᕝᕕᖃᕐᓂᕐᒧᓪᓗ ᐳᓛᕆᐊᕐᓂᕐᒥᒃ ᑎᐹᖕᒥᓪᓗ ᓂᐅᕕᐊᒃᓴᖃᖅᐸᒃᑐᓄᑦ ᐱᓕᕆᔾᔪᑎ ᐊᑐᓕᖅᑎᑦᑎᔨᒥᒃ/ᐊᕙᑎᑦᑎᓐᓂ ᐋᓐᓂᐊᖃᕐᓇᙱᑦᑐᓕᕆᔨᒧᑦ (EHO).

ᑎᐹᖕᒥᑦ ᖃᐅᔨᓴᕐᓃᑦ:

ᑎᐹᒃᑖᕆᔭᐅᒐᔪᒃᑐᓄᑦ ᖃᐅᔨᓴᕐᓂᐅᔪᑦ ᓇᓗᓇᐃᕈᑕᐅᓂᐊᖅᐳᑦ ᑎᐹᖕᓂᑦ ᓂᐅᕕᐊᒃᓴᖃᖅᐸᒃᑐᑦ ᐃᖅᑲᓇᐃᔭᖅᑎᖏᓪᓗ ᒪᓕᑦᑎᐊᕋᓗᐊᕐᒪᖔᑕ ᑎᐹᖕᒧᑦ ᓱᐴᖅᑐᕐᓂᕐᒧᓪᓗ ᐱᖁᔭᕐᒥᑦ ᒪᓕᒐᖏᓐᓂᓪᓗ.

ᐅᑯᐊᑦᑕᐅᖅ ᖃᐅᔨᒪᔭᐅᑦᑎᐊᕋᓱᒋᐊᖃᖅᑐᑦ:

• ᐃᖅᑲᓇᐃᔭᖅᑏᑦ ᖃᐅᔨᒋᐊᖃᑦᑕᖅᐳᑦ ᓇᓗᓇᐃᒃᑯᑕᕐᒥᒃ ᓂᐅᕐᕈᑎᖃᖅᐸᙱᖦᖢᑎᒡᓗ ᑎᐹᖕᒥᑦ, ᓯᒡᒐᓕᐊᙳᐊᓂᑦ ᐊᓯᖏᓐᓂᒡᓗ ᓯᒡᒐᓕᐊᙳᐊᓂᑦ ᐃᓄᖕᓄᑦ 19 ᑐᖔᓂ ᐅᑭᐅᓕᖕᓄᑦ.
• ᓂᐅᕕᕐᕕᒃ ᑎᑎᕋᖅᓯᒪᔪᒥᑦ ᑎᐹᖕᒧᑦ ᐊᑐᐊᒐᓕᒃ, ᐱᓕᕆᔾᔪᓯᓕᒃ, ᐃᓕᓯᓯᒪᔪᖅ ᐱᑦᑕᐃᓕᑎᑦᑎᓂᕐᒧᑦ ᓂᐅᕕᐊᒃᓴᖃᖅᑕᐃᓕᒪᓂᕐᒧᓪᓗ ᑎᐹᖕᓂᑦ ᓯᒡᒐᓕᐊᓂᓪᓗ ᐅᑭᐅᑭᑦᑐᓄᑦ.
• ᐃᖅᑲᓇᐃᔭᖅᑎᓕᒫᑦ ᐱᓕᒻᒪᒃᓴᖅᑎᑕᐅᖃᑦᑕᖅᑐᑦ ᐃᓕᓐᓂᐊᖅᑎᑕᐅᓪᓗᑎᓪᓗ ᑎᐹᖕᓂᑦ ᓂᐅᕕᖅᑎᑦᑎᓚᐅᙱᓐᓂᖏᓐᓂᑦ ᐊᒻᒪ ᐊᑐᖅᑕᐅᖔᕈᓐᓇᖅᑐᓂᒃ ᓯᒡᒐᓕᐊᙳᐊᓂᑦ.
• ᓂᐅᕕᕐᕕᒋᔭᐅᕙᒃᑐᑦ ᐊᑐᖅᐸᒃᑕᖏᑦ ᐃᓕᐅᖅᑲᖅᑕᐅᓯᒪᕗᑦ ᓇᐅᑦᑎᖅᓱᖅᓯᓂᐊᕐᓗᑎᒃ ᐃᖅᑲᓇᐃᔭᖅᑎᓂᒃ ᓇᓗᓇᐃᖅᑕᐅᖁᓪᓗᒍ ᒪᓕᑦᑎᐊᕋᓗᐊᕐᒪᖔᑕ TSA−ᒧᑦ, ᐊᒃᑐᐊᓂᓕᖕᓂᒃ ᒪᓕᒋᐊᖃᖅᐸᒃᑐᓂᒃ ᑲᒻᐸᓂᐅᓪᓗ ᐊᑐᐊᒐᖏᓐᓂᒃ.
• ᓇᓗᓇᐃᒃᑯᑕᓪᓗᐊᑕᐃᑦ ᓂᕕᙶᑎᖅᓯᒪᓗᑎᒃ.

ᐊᕙᑎᓕᕆᓂᕐᒧᑦ ᖃᓄᐃᙱᑦᑎᐊᖅᑐᓕᕆᔩᑦ

ᐊᑐᓕᖅᑎᑦᑎᔨ/ᐊᕙᑎᑦᑎᓐᓂ ᐋᓐᓂᐊᖃᕐᓇᙱᑦᑐᓕᕆᔩᑦ ᐱᓕᕆᐊᒃᓴᖏᑦ ᐃᓚᖃᖅᐳᑦ ᑭᒃᑯᑐᐃᓐᓇᕐᓂᒃ ᐃᓕᓐᓂᐊᑎᑦᑎᓂᕐᒥᑦ, ᖃᐅᔨᓴᖅᐸᒡᓗᑎᓪᓗ ᑎᐹᖕᓂᑦ ᓂᐅᕕᐊᒃᓴᖃᖅᐸᒃᑐᓂᒃ ᓇᓗᓇᐃᖅᓯᓂᕐᒧᑦ ᒪᓕᑦᑎᐊᕋᓗᐊᕐᒪᖔᑕ ᑎᐹᖕᒧᑦ ᓱᐴᖅᑐᕐᓂᕐᒧᓪᓗ ᐱᖁᔭᕐᒥ ᒪᓕᒐᖏᓐᓂᓪᓗ, ᐊᒻᒪ ᑭᐅᔪᓐᓇᕐᓗᒋᑦ ᐃᓄᖕᓄᑦ ᐅᖃᐱᓘᑕᐅᔪᑦ.

ᐅᖃᐅᓯᖃᕐᓂᐊᕐᓗᓂ ᖃᓄᑐᐃᓐᓇᖅ ᓱᕋᐃᓂᕆᔭᐅᔪᑦ ᑖᒃᑯᓂᖓ ᓄᑖᓂᒃ ᒪᓕᒐᕐᓂᒃ ᐃᖅᑲᓇᐃᔭᕐᕕᒋᔭᕐᓂ, ᖃᐅᔨᒃᑲᕐᓗᒋᑦ ᐃᖅᑲᓇᐃᔭᖅᑎᓄᑦ ᐊᑦᑕᕐᓇᖅᑐᓂᑦ ᐊᒻᒪ ᓇᓪᓕᐅᒃᑯᒫᓂᑦ ᖃᐅᔨᓴᖅᑏᑦ (WSCC) ᐅᖄᓚᕝᕕᒋᓗᒋᑦ ᐅᕗᖓ 1-877-404-4407 ᐅᕚᓘᓐᓃᑦ ᐅᕗᙵᕐᓗᓯ www.wscc.nt.ca. 

ᓱᕋᐃᔪᓄᑦ ᐊᓯᐊᓂ ᓱᐴᖅᑐᕐᕕᐅᒋᐊᖃᙱᑦᑐᓂᒃ ᐃᓂᓂᒃ ᐅᕝᕙᓘᓐᓃᑦ ᑭᒡᓕᒋᑎᑕᐅᔪᒥᒃ ᓲᕐᓗ ᓂᐅᕕᕐᕕᐅᑉ ᓵᑦᑎᐊᖓᓂ, ᐃᓕᓐᓂᐊᕐᕕᐅᑉ ᓯᓚᑖᓂ ᐅᕝᕙᓘᓐᓃᑦ ᐋᓐᓂᐊᕕᐊᓘᓪᓘᓐᓃᑦ ᓯᓚᑖᓂ, ᖃᐅᔨᒃᑲᕐᓗᒍ ᐊᐅᓚᑦᑎᔨ ᐅᕝᕙᓘᓐᓃᑦ ᓇᖕᒥᓂᖃᖅᑎ, ᑲᒪᒋᔭᖃᕆᐊᖃᕐᓂᖓᓄᑦ ᓇᓗᓇᐃᖅᓯᓂᕐᒥᒃ ᐃᖅᑲᓇᐃᔭᖅᑏᑦ, ᓂᐅᕕᕆᐊᖅᓯᒪᔪᑦ ᐅᕝᕙᓘᓐᓃᑦ ᐳᓛᕆᐊᖅᓯᒪᔪᑦ ᒪᓕᑦᑎᐊᕐᓗᑎᒃ ᓱᐴᖅᑐᕐᓂᕐᒧᑦ ᒪᓕᒐᕐᓂᒃ.

ᐅᖃᐱᓗᒃᑐᖃᕈᒪᓗᓂ ᐊᑐᖅᑐᐊᖅᑎᐅᑉ ᐊᑐᖃᑦᑕᖅᑕᖓᓂᒃ, ᓯᒡᒐᓕᐊᙳᐊᒥᒃ, ᐅᕝᕙᓘᓐᓃᑦ ᓱᕐᕋᖕᓇᖅᑐᒥᒃ, ᐅᖄᓚᓗᑎᑦ ᐃᕐᖐᓐᓈᖅᑕᐅᒃᑯᓪᓘᓐᓃᑦ ᑎᑎᕋᕐᓗᑎᑦ ᓄᓇᓕᖕᓂ ᐃᒡᓗᓕᕆᔨᒃᑯᓐᓄᑦ ᐅᕝᕙᓘᓐᓃᑦ ᐊᕕᒃᑐᖅᓯᒪᔪᓂ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑎᑎᕋᕐᕕᖓᓐᓄᑦ.

ᖃᓄᑐᐃᓐᓇᖅ ᐊᓯᖏᑦ ᖃᐅᔨᒋᐊᕈᒪᒍᕕᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ − ᑎᐹᖕᒧᑦ ᓱᕐᕋᖕᓇᖅᑐᓄᓪᓗ ᐱᓕᕆᐊᓄᑦ ᐅᕗᙵᕈᓐᓇᖅᐳᑎᑦ tobacco@gov.nu.ca.