ᓱᕐᕋᖕᓇᖅᑐᓂᒃ ᐊᑐᖅᐸᒃᑎᓪᓗᒋᑦ ᐊᖓᔪᖅᑳᑦ, ᓄᑕᕋᓛᒃᓴᖃᖅᑐᑦ ᐊᒻᒪ ᓄᑕᕋᕐᒥᓂᒃ ᐊᒫᒪᒃᑎᑦᑎᔪᑦ
ᓱᕐᕋᖕᓇᖅᑐᓂᒃ ᐊᑐᖅᐸᒃᑎᓪᓗᒋᑦ ᐊᖓᔪᖅᑳᑦ, ᓄᑕᕋᓛᒃᓴᖃᖅᑐᑦ ᐊᒻᒪ ᓄᑕᕋᕐᒥᓂᒃ ᐊᒫᒪᒃᑎᑦᑎᔪᑦ
ᓯᖓᐃᓂᖅ | ᐃᕕᐊᖏᕐᒥ ᐊᒫᒪᒃᑎᑦᑎᓂᖅ | ᑲᑎᖃᑎᖃᕐᓂᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᔨᓂᒃ | ᐃᑲᔪᖅᑕᐅᔾᔪᑎᒃᓴᑦ ᐊᑐᐃᓐᓇᐅᔪᑦ | ᐊᖓᔪᖅᑳᖑᓂᖅ
ᖃᐅᔨᒪᔭᐅᙱᑦᑐᖅ ᖃᓄᖅ ᐊᖏᑎᒋᒃᐸᑦ ᐊᑦᑕᕐᓇᖅᑎᒋᒻᒪᖔᑦ ᓱᕐᕋᖕᓇᖅᑐᖅ ᐱᔭᐅᖃᑦᑕᖅᑎᓪᓗᒍ ᓄᑕᕋᓛᒃᓴᓕᖕᒧᑦ ᐅᕝᕙᓘᓐᓃᑦ ᐊᒫᒪᒃᑎᑦᑎᔪᒧᑦ. ᓱᕐᕋᖕᓇᖅᑐᖅᑐᖃᑦᑕᕐᓗᓂ ᐅᕝᕙᓘᓐᓃᑦ ᐳᔪᕐᒦᑲᑕᒡᓗᓂ ᓄᑕᕋᓛᑉ ᐊᖏᒡᓕᕙᓪᓕᐊᓂᖓ ᐱᕈᖅᐸᓪᓕᐊᓂᖓᓗ ᐱᐅᔪᓐᓃᕈᑕᐅᔪᓐᓇᖅᐳᖅ.
ᓱᕐᕋᖕᓇᖅᑐᖅ ᓄᑕᕋᓛᒃᓴᖃᕐᓂᖅ ᐊᒻᒪ ᐊᒫᒪᒃᑎᑦᑎᓂᖅ: ᖃᐅᔨᒪᔭᕆᐊᖃᖅᑕᑎᑦ
ᓱᕐᕋᖕᓇᖅᑐᖅᑐᖃᑦᑕᕐᓗᓂ ᓄᑕᕋᓛᒃᓴᖃᕐᓗᓂ ᐊᒫᒪᒃᑎᑦᑎᓗᓂᓘᓐᓃᑦ ᐃᓕᖕᓄᑦ ᓄᑕᕋᓛᕐᒧᓪᓘᓃᑦ ᐱᐅᙱᑦᑑᔪᓐᓇᖅᑐᖅ.
ᓯᐊᒻᒪᒃᑎᓪᓗᒍ THC−ᒥᒃ ᓄᑕᕋᓛᕐᒧᑦ: ᐃᓚᐅᕈᑎᒃᓴᑦ ᓱᕐᕋᖕᓇᖅᑐᒦᑦᑐᑦ ᓄᑕᕋᓛᕐᓄᐊᕈᓐᓇᖅᑐᑦ ᐊᕐᕌᒃᑰᕐᓗᑎᒃ ᐅᕝᕙᓘᓃᑦ ᐃᒻᒧᖓᓂᖔᕐᓗᑎᒃ ᐊᓈᓇᖓᓂ. ᑕᒪᓐᓇ ᐊᓯᔾᔨᖅᓯᔪᓐᓇᖅᐳᖅ ᖃᓄᖅ ᓄᑕᕋᓛᖅᐱᑦ ᐊᖏᒡᓕᐊᕙᖕᓂᖓᓂᒃ ᐱᕈᖅᐸᓪᓕᐊᓂᖓᓂᒃᓗ.
ᖃᓄᖅ ᓱᕐᕋᖕᓇᖅᑐᖅ ᐊᒃᑐᐃᓲᖑᕙ ᓄᑕᕋᓛᖁᑎᖕᓂᒃ:
- ᐊᓯᔾᔨᖅᓯᓂᕆᕙᒃᑕᖓ ᓄᑕᕋᓛᑉ ᖃᕋᓴᖓᓂᒃ: ᓱᕐᕋᖕᓇᖅᑐᖅᑐᖃᑦᑕᕐᓗᓂ ᓄᑕᕋᓛᑉ ᖃᕋᓴᖓᓄᑦ ᐊᒃᑐᐃᓂᖃᕈᓐᓇᖅᑐᖅ ᐱᐅᙱᑦᑐᒥᒃ. ᐊᑲᐅᙱᓕᐅᕈᑕᐅᓕᕈᓐᓇᖅᑐᖅ ᓈᓚᒍᓐᓇᕐᓂᕐᒧᑦ, ᐃᖅᑲᐅᒪᔪᓐᓇᕐᓂᕐᒧᑦ, ᐊᒻᒪ ᐱᖅᑯᓯᕆᓇᔭᖅᑕᖓᓄᑦ ᐱᕈᕈᑎᒃ.
- ᐃᕐᓂᓵᓕᓂᖅ: ᓱᕐᕋᓇᖅᑐᖅᑐᖃᑦᑕᕐᓗᓂ ᓄᑕᕋᓛᒃᓴᖃᕐᓗᓂ ᒥᑭᓂᖅᓴᐅᔪᓐᓇᖅᑐᖅ ᐃᓄᕐᓗᓂᓘᓃᑦ ᐃᓅᔪᓐᓇᕆᓪᓗᓂ.
- ᐱᕈᖅᐸᓪᓕᐊᓂᖅ: ᓄᑕᕋᓛᒃᓴᕆᔭᐅᓪᓗᑎᒃ ᓱᕐᕋᖕᓇᖅᑐᒧᑦ ᐊᒃᑐᖅᑕᐅᓯᒪᔪᑦ ᐅᐃᒪᔮᓕᕈᓐᓇᕐᓂᖅᓴᐅᕗᑦ, ᐃᓕᖅᑯᓯᕐᒥᓂᒃ ᐊᐅᓚᑦᑎᔪᓐᓇᐃᓪᓕᕙᒃᖢᑎᒃ ᐊᒻᒪ ᓯᓂᒍᓐᓇᑦᑎᐊᖅᐸᙱᖦᖢᑎᒃ ᐃᓐᓇᕈᖅᐸᓪᓕᐊᓕᖅᑎᓪᓗᒋᑦ.
- ᓱᐴᖅᑐᖅᑕᐅᔫᑉ ᐳᔪᕐᓗᐊᓂᒃ ᓂᐅᖅᓯᓂᖅ: ᓱᐴᖅᑐᖅᑕᐅᔫᑉ ᐳᔪᖓ ᓱᕐᕋᖕᓇᖅᑐᒥᑦ ᑕᕝᕚᑭᒥᒡᓘᓐᓃᑦ ᐊᑦᑕᕐᓇᖅᐳᖅ ᓄᑕᕋᓛᓄᑦ. ᑕᒪᕐᒥᒃ ᐅᓄᖅᑐᓂᒃ ᐃᓚᐅᕈᑎᒃᓴᖃᕐᒪᑕ ᐊᓂᖅᓵᖅᑐᑦᑎᐊᕈᓐᓃᕐᓇᖅᑐᓂᒃ.
ᐊᑦᑕᕐᓇᙱᓛᖑᔪᖅ ᓱᕐᕋᖕᓇᖅᑐᒥᒃ ᐱᑦᑕᐃᓕᒪᓗᑎᑦ ᓄᑕᕋᓛᖅᐱᑦ ᖃᓄᐃᙱᑦᑎᐊᕈᓯᖓᓄᑦ ᐋᓐᓂᕈᑕᐅᔪᓐᓇᕐᒪᑦ.
ᓱᕐᕋᖕᓇᖅᑐᖅᑐᖃᑦᑕᕈᒪᒍᕕᑦ ᓄᑕᕋᓛᒃᓴᖃᖅᑎᓪᓗᑎᑦ ᐊᒫᒪᒃᑎᑦᑎᓗᑎᓪᓘᓐᓃᑦ, ᐱᓗᐊᖅᑕᐃᓕᒪᓇᓱᒃᐸᒡᓗᑎᑦ, ᐱᒐᔪᙱᓐᓂᖅᓴᐅᓗᑎᑦ, ᓂᕈᐊᖅᐸᒡᓗᑎᓪᓗ ᓱᕐᕋᖕᓇᖅᑐᓂᒃ THC−ᖃᓗᐊᙱᑦᑐᓂᒃ ᐊᒻᒪ CBD−ᖃᓗᐊᙱᑦᑐᓂᒃ.
ᑐᑭᓯᒋᐊᒃᑲᓐᓂᕈᒪᒍᕕᑦ, ᓇᕿᓪᓗᒍ ᐊᑖᓃᑦᑐᖅ ᑲᓱᕐᕕᒃ.
ᐊᑦᑕᕐᓇᕈᓐᓇᕐᓂᖓ ᐸᓚᖅᑎᓐᓇᓱᐊᕐᓗᒍ
ᐊᑦᑕᕐᓇᙱᓛᖅ ᓄᑕᕋᓛᕐᓄᑦ ᓱᕐᕋᖕᓇᖅᑐᖅᑐᖅᐸᙱᓪᓗᓂ ᐃᓅᓚᐅᙱᑎᓪᓗᒍ ᓄᑕᕋᓛᖅ ᐊᒻᒪ ᐊᒫᒪᒃᑎᑦᑎᑎᓪᓗᓂ.
ᐱᖃᑦᑕᕐᓂᐊᕈᕕᑦ ᓱᕐᕋᓐᓇᖅᑐᒥᒃ, ᐊᑦᑕᕐᓇᖏᓐᓂᖅᓴᐅᔪᓐᓇᖅᑐᖅ ᓄᑕᕋᓛᖁᑎᖕᓄᑦ ᐃᒪᐃᓕᐅᕈᕕᑦ:
- ᐅᖃᖃᑎᖃᕐᓗᑎᑦ ᐅᒃᐱᕆᔭᕐᓄᑦ ᐃᓐᓇᕐᒧᑦ, ᐃᓚᖕᓄᑦ, ᐱᖃᓐᓇᕆᔭᕐᓄᓪᓘᓐᓃᑦ ᐊᔪᕆᖅᓲᔾᔭᐅᔪᒪᓗᑎᑦ ᐃᓱᒪᒃᑯᓪᓗ ᖃᓄᐃᙱᑦᑐᓐᓇᕐᓂᕐᒧᑦ ᐃᑲᔪᖅᑐᖅᑕᐅᔪᒪᓗᑎᑦ.
- ᐊᑐᕋᔪᙱᓐᓂᖅᓴᐅᕙᒡᓗᒍ, ᒥᑭᓐᓂᖅᓴᓂᒃ ᐱᕙᒡᓗᑎᑦ, ᓂᕈᐊᖅᐸᒡᓗᓯᓗ ᓱᕐᕋᖕᓇᖅᑐᓂᒃ ᐊᑦᑎᖕᓂᖅᓴᓂᒃ THC−ᓕᖕᓂᒃ ᓴᙲᓐᓂᖅᓴᓂᒡᓗ CBD−ᖃᖅᑐᓂᒃ.
- ᓱᕐᕋᖕᓇᖅᑐᖅᑐᖅᐸᒡᓗᑎᑦ ᐃᒡᓗᕕᑦ ᓯᓚᑖᓂ ᓄᓇᓯᐅᑎᕕᓪᓘᓃᑦ ᐊᓐᓄᕌᑎᓪᓗ ᐊᓯᔾᔨᖅᐸᒡᓗᒋᑦ ᓄᑕᕋᓛᖅ ᑎᒍᓚᐅᙱᓐᓂᕐᓂ ᐅᕝᕙᓘᓃᑦ ᐊᒫᒪᒃᑎᓚᐅᙱᓐᓂᕐᓂ.
- ᓯᓂᒃᐸᙱᓪᓗᑎᑦ ᑕᕝᕙᓂᑦᑕᐃᓐᓇᖅ ᐃᒡᓕᕐᒥ ᓄᑕᕋᓛᖅᐱᑦ ᓱᕐᕋᖕᓇᖅᑐᖅᑐᓚᐅᖅᑎᓪᓗᑎᑦ ᐅᔾᔨᕆᑦᑎᐊᙱᓐᓂᖅᓴᐅᓐᓇᕐᒪᑦ ᐊᑦᑕᕐᓇᕐᓂᖅᓴᐅᓪᓗᓂᓗ.
ᑲᑐᔾᔨᖃᑎᖃᕐᓃᑦ ᓴᙱᔫᑎᓪᓗᒍ ᐊᑲᐅᔪᒧᑦ ᐅᕝᕙᓘᓃᑦ ᐃᓚᖕᓄᑦ ᓴᙱᔫᓗᑎᑦ
ᐊᐃᑉᐸᕆᔭᐅᔪᑦ, ᖃᑕᙳᑎᒌᑦ, ᐱᖃᓐᓇᕆᔭᓪᓗ ᐱᒻᒪᕆᐊᓗᖕᒥᒃ ᐱᓕᕆᐊᖃᖅᐸᒃᐳᑦ ᓄᑕᕋᓛᒃᓴᓕᖕᓂᒃ ᓄᑕᕋᓛᓂᒡᓗ ᖁᐊᖅᓵᕐᓇᖅᑐᒦᑎᑦᑎᙱᖦᖢᑎᒃ ᓱᕐᕋᖕᓇᖅᑐᓂᖔᖅᑐᓂᒃ.
- ᖁᕕᐊᓱᖃᑎᒌᒡᓗᓯ ᐊᑕᐅᑦᑎᒃᑯᑦ ᖃᓄᐃᓕᐅᕈᓘᔭᖃᑦᑕᕐᓗᓯ: ᓄᓇᒦᑉᐸᒡᓗᓯ, ᓂᕿᑦᑎᐊᕙᖕᓂᒃ ᓂᕆᖃᑎᒌᒃᐸᒡᓗᓯ, ᐅᕝᕙᓘᓐᓃᑦ ᓴᓇᐅᒐᓕᐅᖅᐸᒡᓗᓯ ᒥᖅᓱᕐᓗᓯᓪᓘᓐᓃᑦ.
- ᐊᖏᕐᕋᐃᑦ ᓱᐴᖅᑐᖅᕕᐅᑎᑉᐸᙱᓪᓗᒍ: ᐳᔪᕐᒥᖔᖅᑐᖅ ᒥᑭᑦᑑᒐᓗᐊᖅᐸᑦ ᐊᖏᔫᒐᓗᐊᖅᐸᓪᓘᓃᑦ ᑎᐹᖕᒥᖔᖅᑐᖅ ᓱᕐᕋᖕᓇᖅᑐᒥᒡᓘᓃᑦ ᓱᓕ ᐊᑦᑕᕐᓇᖅᑑᕗᖅ.
- ᓱᕐᕋᖕᓇᖅᑐᖅᑐᖅᐸᙱᓪᓗᑎᑦ ᓄᑕᕋᖅᑕᖃᖅᑎᓪᓗᒍ: ᓱᕐᕋᖕᓇᖅᑐᖅᑐᖅᐸᙱᓪᓗᑎᑦ ᓄᑕᕋᖅᑕᖃᖅᑎᓪᓗᒍ ᐅᕝᕙᓘᓃᑦ ᑐᓂᑦᑕᐃᓕᓗᒋᑦ.
ᐋᓐᓂᐊᓯᐅᑎᒥᒃ ᖃᐅᔨᔭᐅᑎᓪᓗᑎᑦ ᐃᓕᖕᓂᒃ
ᐋᓐᓂᐊᓯᐅᑎᑦ ᐱᒻᒪᕆᐅᔪᓂᒃ ᑐᓴᖅᑎᑦᑎᔪᓐᓇᖅᐳᑦ ᐊᑦᑕᕐᓇᕐᓂᖏᓐᓂᒃ ᓱᕐᕋᖕᓇᖅᑐᑦ ᓄᑕᕋᓛᒃᓴᖃᖅᑎᓪᓗᒋᑦ ᐊᒫᒪᒃᑎᑦᑎᑎᓪᓗᒋᓪᓗ ᖃᐅᔨᒪᔭᐅᔭᕆᐊᓕᖕᓂᒃ. ᐃᒪᓐᓇᐅᖁᔨᔪᓐᓇᕆᕗᑦᑕᐅᖅ ᖁᐊᖅᓵᕐᓇᙱᑦᑐᒃᑯᑦ ᐊᑐᖅᑕᐅᔪᓐᓇᖅᑐᓂᒃ ᐊᐅᓚᑦᑎᕝᕕᖃᕐᓂᐊᕐᓗᓂ ᓄᑕᕋᒃᓴᖃᕐᓂᕐᒥᒃ ᐃᕐᓂᓵᖅᓯᒪᓕᕐᓗᓂᓗ ᖃᐅᔨᔾᔪᑕᐅᔪᓐᓇᖅᑐᓂᒃ ᓲᕐᓗ ᒥᕆᐊᙳᑲᑕᖕᓂᖅ, ᒥᕆᐊᑲᑕᖕᓂᖅ ᐋᓐᓂᐊᕐᓂᕐᓘᓐᓃᑦ.
ᐋᓐᓂᐊᓯᐅᑎᒧᑦ ᑕᑯᔭᖅᑐᒐᔪᒡᓗᑎᑦ ᓴᐳᔾᔨᓯᒪᔪᓐᓇᖅᐳᑎᑦ ᐃᒡᕕᑦ ᓄᑕᕋᓛᓪᓗ ᖃᓄᐃᙱᑦᑎᐊᕈᓯᖏᓐᓂᒃ.
ᐊᑐᐃᓐᓇᐅᔪᑦ ᐃᑲᔪᖅᑐᖅᑕᐅᔾᔪᑎᑦ
ᓇᖕᒥᓂᖅ ᐊᒫᒪᒃᑎᑦᑎᖃᑦᑕᕈᕕᑦ ᖃᐅᔨᒪᔭᖃᕈᕕᓪᓘᓃᑦ ᐊᒫᒪᒃᑎᑦᑎᓲᒥᒃ ᓱᕐᕋᖕᓇᖅᑐᒥᒃ ᐱᕙᒡᓗᓂ, ᑭᖑᕙᓗᐊᙱᑦᑎᐊᖅᑐᖅ ᐃᑲᔪᖅᑕᐅᔪᒪᔭᕆᐊᒃᓴᖅ.
ᐊᑭᖃᙱᑦᑐᒥᒃ, ᑐᓴᖅᑕᐅᕈᓘᔭᔾᔮᙱᑦᑐᒥᒃ ᐃᑲᔫᑎᒃᓴᖅᑕᖃᖅᑐᖅ ᑕᒪᐃᓐᓂᒃ ᐋᓐᓂᐊᕕᓕᒫᓂ. ᐃᑲᔪᕆᑦ ᑕᐃᒃᑯᓂᖓ ᐊᑐᓗᐊᕈᒪᔪᓐᓃᕈᒪᔪᓂᒃ ᐅᕝᕙᓘᓐᓃᑦ ᓄᖅᑲᕈᒪᔪᓂᒃ ᓱᕐᕋᖕᓇᖅᑐᒥᒃ, ᐅᖄᓚᓗᑎᑦ ᓄᖅᑲᕐᓂᕐᒧᑦ ᐅᖄᓚᕝᕕᒃᓴᖅ ᐅᕗᖓ 1-866-368-7848 ᐅᕝᕙᓘᓐᓃᑦ ᑐᓴᖅᑎᑦᑎᓗᑎᑦ ᓄᖅᑲᕐᓂᕐᒧᑦ ᐃᑲᔪᖅᑎᒥᑦ ᓴᖅᑭᔮᑲᐅᑎᒋᔪᕐᒥ ᖃᕆᑕᐅᔭᒃᑯᑦ.
ᐊᖓᔪᖅᑳᖑᓂᖅ ᐊᒻᒪ ᓱᕐᕋᖕᓇᖅᑐᖅ: ᓴᐳᔾᔨᓂᖅ ᓄᑕᖅᑲᓂᒃ ᐅᓗᕆᐊᓇᕈᓐᓇᖅᑐᓂᒃ ᓱᕐᕋᖕᓇᖅᑐᒥᒃ
ᐊᖓᔪᖅᑳᕆᔭᐅᓪᓗᓂ, ᑐᑭᓯᐅᒪᓂᖅ ᐊᑦᑕᕐᓇᕈᓐᓇᕐᓂᖏᓐᓂᒃ ᓱᕐᕋᖕᓇᖅᑐᑦ ᖃᓄᐃᓕᐅᕆᐊᖅᐸᒡᓗᑎᓪᓗ ᕿᑐᕐᖓᑎᑦ ᓴᐳᑎᓯᒪᓇᓱᒡᓗᒋᑦ ᐱᒻᒪᕆᐅᕗᖅ.
ᐊᑦᑕᕐᓇᖅᑕᐃᓕᒪᔾᔪᑎᒋᔪᓐᓇᖅᑐᑦ ᑕᒪᔾᔭ ᐃᓚᖏᑦ:
- ᐊᔾᔪᒥᓇᖅᑑᓇᓱᒡᓗᑎᑦ: ᓄᑕᖅᑲᐃᑦ ᐃᓕᑦᑎᕙᒃᐳᑦ ᑕᑯᕙᒃᑕᒥᖕᓂᒃ. ᓯᓚᑐᔪᒃᑯᑦ ᓱᕐᕋᖕᓇᖅᑑᑉ ᒥᒃᓵᓄᑦ ᐃᓕᖅᑯᓯᖃᓕᕐᓂᕆᔭᑦ ᒪᓕᒃᑕᐅᔪᓐᓇᖅᐳᖅ ᐃᔾᔪᐊᕐᓗᑎᒡᓗ.
- ᓱᕐᕋᖕᓇᖅᑐᖅᑐᖅᐸᙱᓪᓗᑎᑦ ᓄᑕᖅᑲᐃᑦ ᖃᓂᒋᔭᖏᓐᓂ: ᓱᐴᖅᑐᖅᑕᐅᔫᑉ ᐳᔪᐊ ᐊᑦᑕᕐᓇᖅᐳᖅ, ᑕᕝᕚᑭᐅᑉ ᐳᔪᖓᑎᑐᑦ.
- ᐅᖃᓪᓚᖃᑎᒋᕙᒡᓗᒋᑦ ᐅᒃᑯᐃᖓᕝᕕᒋᑦᑎᐊᕐᓗᒋᑦ: ᐅᓂᒃᑲᐅᓯᕆᓗᒋᑦ ᐊᑦᑕᕐᓇᕈᓐᓇᕐᓂᖏᑦ ᓱᕐᕋᖕᓇᖅᑐᑦ ᑭᐅᕙᒡᓗᒋᓪᓗ ᐊᐱᖅᑯᑎᖏᑦ ᓱᓕᑦᑎᐊᕐᓗᑎᑦ. ᑕᒻᒪᖅᓯᒪᙱᑦᑐᓂᒃ ᑐᓴᐅᒪᑎᑉᐸᒡᓗᒋᑦ ᐱᐅᔪᓂᒃ ᓂᕈᐊᕆᔭᖃᕈᓐᓇᕐᓂᕐᒥᒃ ᐃᓱᒪᓕᐅᖔᖃᑦᑕᓛᕐᒪᑕ ᓯᕗᓂᒃᓴᒥᖕᓂ.
ᐃᓕᑦᑎᒃᑲᓐᓂᕈᒪᒍᕕᑦ, ᑕᑯᒋᐊᕐᓗᒍ ᐅᖃᓪᓚᖃᑎᖃᕐᓂᖅ ᒪᒃᑯᒃᑐᓂᒃ ᓱᕐᕋᖕᓇᖅᑑᑉ ᒥᒃᓵᓄᑦ.